रामेछाप नगरपालिकाका चार ओटा स्वास्थ्य संस्था निर्माणको जिम्मा लिएको निर्माण कम्पनीले समयमा नै काम सम्पन्न नगर्दा सेवा प्रवाहमा समस्या भएको छ ।
दुई वर्षदेखि स्वास्थ्य संस्था निर्माणको काम निर्माण कम्पनीले समयमा नगर्दा सो नगरपालिका–१ को गोठगाउँ, स्वास्थ्य चौकी, वडा नं ४ को हिमगङ्गा स्वास्थ्य चौकी, वडा नं ५ को रामपुर स्वास्थ्य चौकी र वडा नं ६ को ओख्रेनी स्वास्थ्य चौकी अलपत्र अवस्थामा छन् ।
निर्माणाधीन गोठगाउँ स्वास्थ्य चौकीको काम ८५ प्रतिशत हिमगङ्गाको ८२ प्रतिशत रामपुरको ९० प्रतिशत र ओख्रेनीको पनि ९० प्रतिशत सकिएको छ ।
तर, निर्माण कम्पनी दुई वर्षदेखि काम छाडेर हिँडेपछि निर्माण सम्पन नै नभई भवनहरु थोत्रिँदै गएका छन् । निर्माण कम्पनीलाई बारम्बार ताकेता गरेको भए पनि काम समयमा नगरिदिएको रामेछाप नगरपालिका प्रमुख लवश्री न्यौपानेले बताउनु भयो ।
ती भवनको जिम्मा स्काई/विवस जेभीले लिएको थियो । अहिले कम्पनी सम्पर्कमा समेत छैन । स्वास्थ्य संस्थाका भवन नबन्दा साँघुरा भवनबाट सेवा प्रवाह भइरहेको छ ।