लुत्तो निको पार्न औषधि खोज्दै वीरगंज–२५ श्रीसियाको एक सरकारी विद्यालयका शिक्षक सोही वडाको आदर्शचोकस्थित श्रीसिया हेल्थ पोष्टमा बिहीबार जानु भयो ।
उहाँले स्कावेयल नाम गरेको लुत्तोको औषधि पाउनु भएन । सरकारले स्वास्थ्य चौकीमा निःशुल्क उपलब्ध गराउने ३९ प्रकारको औषधिमध्ये लुत्तोको औषधि पनि एक हो ।
स्वास्थ्य केन्द्रबाट फर्किनु भएका शिक्षकको टिप्पणी थियो नाम मात्रको सरकारी स्वास्थ्य केन्द्र, काम त केही पनि छैन । यो त एउटा प्रतिनिधि घटना मात्र हो ।
स्वास्थ्य केन्द्रमा कार्यरत कर्मचारीहरूले लुत्तोको औषधि कहिले आउँछ भनी किटान गर्न नसकिने भन्दै निजी पसलबाट औषधि किन्नुहोला भन्दै उहाँलाई फर्काएका थिए ।
पर्साको ग्रामीण तहमा रहेका पोखरियामा जिल्ला स्तरीय अस्पताल, बगही, बागेश्वरी र भिखमपुर गरी तीन ओटा प्राथमिक स्वास्थ्य केन्द्र र अन्य ७५ ओटा स्वास्थ्य चौकीहरू रहेका छन् र अधिकांश स्वास्थ्य संस्थाहरूको अवस्था यस्तै छ ।
सरकारी स्वास्थ्य संस्थाहरूमा उपचारका लागि आउने बिरामीहरूको लागि नेपाल सरकारले निःशुल्क औषधिको व्यवस्था गरेको छ ।
स्वास्थ्य चौकीमा ४९ प्रकारका, प्राथमिक स्वास्थ्य केन्द्रमा ५६ प्रकारका र अस्पतालमा ७४ प्रकारका औषधि सर्वसाधारण बिरामीलाई निःशुल्क वितरण गर्नुपर्ने व्यवस्था छ ।
स्वास्थ्य संस्थाहरूमा तोकिएका सबै औषधि उपलव्ध हुँदैनन् । स्वास्थ्य कार्यालय पर्साका प्रमुख कामेश्वर चौरसिया स्वास्थ्य केन्द्रमा औषधिको अभाव रहेको स्वीकार गर्नुहुन्छ ।
‘औषधि अभाव रहेको हामीलाई पनि थाहा छ तर हाम्रो हातमा केही छैन ।’–उहाँले भन्नु भयो–‘औषधि खरिदको जिम्मा स्थानीय तहको हो ।’
प्रमुख चौरसियाका अनुसार जिल्लाका स्वास्थ्य केन्द्रहरूमा खोप आपूर्ति, टिबी रोगको औषधि र क्षेत्रीय कार्यालयबाट आएको निर्देशन पालना गराउने जिम्मेवारी मात्रै जिल्लालाई छ । बाँकी सबै किसिमका औषधि खरिद गरेर स्वास्थ्य संस्थामा दिने काम सम्बन्धित स्थानीय तहको हो ।
स्वास्थ्य संस्थाका प्रमुख एवम् कर्मचारीहरूलाई काम लगाउने र अनुगमन गर्ने जिम्मेवारीसमेत स्थानीय पालिकाको भएकाले आफ्नो अड्डाको भूमिका खासै नरहेको चौरसियाले बताउनु भयो ।
स्वास्थ्य कार्यालय पर्साका अनुसार जिल्लाका १४ ओटा स्थानीय तहमध्ये कसैले पनि हालसम्म औषधि खरिदको टेण्डर निकालेका छैनन् ।