गोकुलगंगा गाउँपालिका–६ की ३४ वर्षीया शर्मिला तामाङलाई ०८२ चैत १५ गते ‘बोक्सी’ को आरोपमा कुटपिट गरेको भन्दै पति ३६ वर्षीय गोपीलाल तामाङलाई प्रहरीले चैत १७ गते गिरफ्तार गरेको छ ।
२०७० सालमा प्रेमविवाह गरेदेखि नै पतिले ‘बोक्सी’ को आरोप लगाउदै कुटपिट गर्दै आएको पीडितको भनाइ छ । कुटपिटका कारण शरीरका विभिन्न भागमा चोटपटक लागेकी शर्मिलालाई उपचारका लागि चैत १६ गते तामाकोशी अस्पताल मन्थलीमा भर्ना गरिएको छ । शर्मिलासँगै १२ वर्षीया छोरी गुञ्जन तामाङ र सात वर्षीय छोरा सुजल तामाङ पनि छन् । यसअघि पनि बारम्बार पतिको कुटपिटबाट पीडित भएकी तामाङको उजुरीमा मिलापत्र गरी घटना दबाउन खोजिएको पीडितको आरोप छ । घटना माथि थप अनुसन्धान जारी रहेको जिल्ला प्रहरी कार्यालय रामेछापका डिएसपी भोला भट्टले जानकारी दिनुभयो ।