कोशी प्रदेशमा मनसनु सक्रिय भएसँगै जनजीवन प्रभावित भएको छ । बाढीपहिरो कारण ओखलढुङ्गा र सुनसरीमा एकएक जना गरी दुई जनाले ज्यान गुमाउनु परेको छ ।
कोशी प्रदेशमा जुन १० अर्थात् ०८१ जेठ २८ गतेदेखि मनसुन सक्रिय भएको छ । विगतका वर्षहरूमा जुन १३ मा सक्रिय हुने मनसुन यस वर्ष तीन दिन अघि अर्थात् जुन १० मा सुरूआत भएपछि भएको वर्षाका कारण कोशी प्रदेशमा प्राकृतिक विपद्का घटना बढेका छन् ।
ओखलढुङ्गा प्रतिनिधि सरस्वती बानियाका अनुसार अविरल वर्षाका कारण गएको पहिरोले घर गोठ पुरिएको छ । चिशंखुगढी गाउँपालिका ५ स्थित थुम्कीका ३९ वर्षीय बाबुराम खत्रीको घर र गोठ पुरिएको छ ।
गोठ पुरिदा खत्रीकी ३५ वर्षीया पत्नी देवकुमारी खत्रीको मृत्यु भएको प्रहरीले जनाएको छ । पहिरोमा पुरिएर १८ वर्षीया मेनुका खत्री घाइते हुनु भएको छ । घाइतेको स्थानीय स्वास्थ्य संस्थामा उपचार भइरहेको छ ।
मोरङ प्रतिनिधि विनोद सुवेदीका अनुसार असार ११ गतेपछि भएको निरन्तरतको वर्षाले विराटनगर महानगरपालिका जलमग्न भएको छ । कोशी राजमार्ग पूर्ण रुपमा बन्द भएको छ ।
कोशी राजमार्ग र सहायक मार्ग जलमग्न भएका कारण आवतजावतमा समस्या भएपछि विद्यालय बन्द गरिएको छ । विद्यालयहरू समेत डुबानमा परेका कारण पठनपाठन प्रभावित भएको सूचना निकालेर विद्यालयले बिदा दिएका छन् । असार १२ गते बिहानदेखि विराटनगर र आसपासका धेरै क्षेत्रमा अत्याधिक वर्षा भइरहेको छ ।
वर्षाका कारण घरभित्र पानी पसेका कारण जनजीवन नै प्रभावित भएको छ । मोरङ र सुनसरीको सिमानामा पर्ने बुढीखोलाको बाढीले एकै परिवारका चार जनालाई बगाएको छ । असार ११ गते माछा मार्ने क्रममा सुन्दरहरैँचा नगरपालिका५ का एकै परिवारका चारजना बगेकामा एकको मृत्यु भएको प्रहरीले जनाएको छ ।
फुदनी भनिने २२ वर्षीया प्रेमकला चौधरीको बाढीले बगाएर मृत्यु भएको जिल्ला प्रहरी कार्यालयका डिएसपी ज्ञानेन्द्र बस्नेतले बताउनु भयो । बाढीले बगाउँदा सो परिवारका दुईजना बेपत्ता छन् । बेपत्ता हुनेमा ६० वर्षीया असरादेवी चौधरी र २५ वर्षीया फुला चौधरी छन् ।
