२८ वर्षीया महिलालाई बलात्कार गरेको फरार आरोपित हरिपुर नगरपालिका–४ का ३३ वर्षीय विक्रम कुमार चौधरीविरुद्धको मुद्दा सर्लाही जिल्ला अदालतले ०८० फागुन २४ गते मुल्तबीमा राख्ने फैसला गरेको छ ।
आराेपितविरुद्ध जिल्ला अदालतमा ०७८ पुस ७ गते दायर भएको मुद्दा न्यायाधीश फणिन्द्र प्रसाद पराजुलीको इजलासले मुल्तबीमा राख्ने फैसला गरेको श्रेस्तेदार सदन अधिकारीले जानकारी दिनु भयो ।
पीडित महिलालाई आरोपितले ०७८ कात्तिक १४ गते बलात्कार गरेको भन्दै पीडित पक्षले इलाका प्रहरी कार्यालय हरिपुरमा मङ्सिर ६ गते उजुरी दिनु भएकाे थियो । इलाका प्रहरी कार्यालय हरिपुरले मङ्सिर ८ गते उजुरी दर्ता गर्याे । पीडित महिलाको स्वास्थ्य परीक्षण मङ्सिर ८ गते जिल्ला अस्पताल मलंगमा गरिएको थियो ।