कृष्णनगरको बाटो हुदै जोखिपूर्ण यात्रामा तेस्रो मुलुक जान थालेका सात जना महिलालाई मङ्सिर १२ गते शिवराज नगरपालिकास्थित चन्द्रौटाबाट उद्धार गरिएको छ ।
भारतको बोर्डर हुँदै तेश्रो मुलुक जान थालेका उदयपुर जिल्लाकी २४ वर्षीया, चितवन जिल्लाकी ३१ वर्षीया, बारा जिल्लाकी २४ वर्षीया, सिन्धुपाल्चोक जिल्लाकी २२ वर्षीया, सप्तरी जिल्लाकी २२ वर्षीया , सुनसरी जिल्लाकी २२ वर्षीया र झापा जिल्लाकी २७ वर्षीया महिलालाई बिशेष सूचनाको आधारमा उद्धार गरिएको शान्ती पुनस्र्थापना गृहकी संयोजक बसन्ती जीसीले जानकारी दिनु भयो ।
कृष्णनगर सेमा नाका भएर भारत जाने र ६ जना कुवेत र ओमनको लागि हिडेका एक जना रहेको शान्ती पुनस्र्थापना गृहका राष्ट्रिय उद्धार संयोजक भूमिराज भट्टराईले बताउनु भयो । शान्ती पुनस्र्थापना गृह कपिलवस्तुले इलाका प्रहरी कार्यालय, कृष्णनगरको सहयोगमा उद्धार कार्य गरेको थियो ।
महिलाहरुको साथमा कुनै कागजात नभएको र को मार्फत तेश्रो मुलुक जदैछु भन्ने बिषयमा खुलेर नबताए पछि थप अनुसन्धान भइरहेको र उनीहरूलाई शान्ती पुनस्र्थापना गृह, कपिलवस्तुमा राखिएको जिल्ला प्रहरी कार्यालयका डिएसपी गंगाबहादुर थापाले जानकारी दिनु भयो ।