आगामी वैशाख १२ गतेदेखि वीरगंज महानगरपालिका–१८ को सखुचैनामा हुने महायज्ञमा दलित समुदायको सहभागिताको माग गर्दै दलित अगुवाहरूले ०७९ चैत २७ गते जिल्ला प्रहरी कार्यालय पर्सामा उजुरी दिएका छन् ।
वैशाख १२ गते देखि सुखचैनामा हुन लागेको महायज्ञमा सहभागि गराउन माग गर्दै दलित अगुवा धुरुपलाल राम र प्रहलाद रामसहित जिल्लाका दलित अगुवाहरूको टोलीले प्रमुख जिल्ला अधिकारी हिरालाल रेग्मीलाई निवेदन दिएका हुन् ।
विष्णु महायज्ञ व्यवस्थापन समितिले यज्ञमा सहभागी गराउन इन्कार गर्नुका साथै प्रशासन वा अन्य कुनै निकायमा उजुरी दिएमा कुटपिट गर्ने र ज्यानै मार्नेसमेत धम्की दिएको निवेदनमा उल्लेख गरिएको छ ।
सुखचैनामा दलित समुदायको ४२ ओटा घर छन् । महायज्ञ व्यवस्थापन समितिमा ६१ जना सदस्य राखिएका छन् । तर, समितिमा दलित समुदायबाट कसैलाई पनि नराखिएको साथै दलीत समुदायसँग चन्दा पनि नमागिएको दलित अगुवाहरूले बताउनुभयो ।
महायज्ञ व्यवस्थापन समितिका अध्यक्ष खोभारी महतो प्रतिक्रिया दिन मानेनन् । समितिका सचिव गोपाल प्रसाद यादवले उनीहरू आफै बस्न नचाहेको प्रतिक्रिया दिए ।
प्रमुख जिल्ला अधिकारी हीरालाल रेग्मीले छुवाछुतजस्तो गम्भीर विषयमा छलफल नगर्ने बताउँदै जिल्ला प्रहरी कार्यालयमा किटानी जाहेरी दिन सुझाव दिए ।
दलित अगुवाहरूले महायज्ञ व्यवस्थापन समितिका अध्यक्ष खोभारी महतो, सचिव गोपालप्रसाद यादव र मन्द्रिका महतोको नामै किटान गरी ०७९ चैत २६ गते जिल्ला प्रहरी कार्यालय पर्सामा उजुरी दिएका छन् ।
किटानी बुझ्दै जिल्ला प्रहरी कार्यालय पर्साका डिएसपी दिपक गिरीले महायज्ञ समितिका अध्यक्षसहितका पदाधिकारीलाई जिल्लामा हाजिर गराउन निर्देशन दिनु भएको छ ।
चैत ८ गतेदेखि १६ गतेसम्म वीरगंज महानगरपालिका–१७ अलौमा सम्पन्न शतचण्डी महायज्ञमा पनि दलित समुदायलाई सहभागी गराइएको थिएन ।
