१३ वर्षीया बालिकालाई बलात्कार गरेको कसुरमा जिल्ला अदालतले हुम्ला जिल्ला, खार्पुनाथ गाउँपालिका–५ का २२ वर्षीय कवि उपाध्यायलाई १८ वर्ष कैद सजायको फैसला सुनाएको छ ।
जिल्ला अदालतका न्यायाधीश मनोजकुमार श्रीवास्तवको ०७९ माघ २६ गतेको इजलासले कसुर गरेको ठहर गर्दै कैद सजायको फैसला गरेको अदालतका सूचना अधिकारी अर्जुनप्रसाद गुरागाँइले बताउनु भयो ।
१३ वर्षीया बालिकालाई ०७९ साउन ३० गते बलात्कार गरेको आरोपमा पीडित पक्षले आरोपितविरुद्ध साउन ३१ गते इलाका प्रहरी कार्यालय अनारमनीमा उजुरी दिएको थियो ।
आरोपितलाई प्रहरीले साउन ३१ गते अनारमनीबाट गिरफ्तार गरेको थियो ।
आरोपितविरूद्ध प्रहरीले जिल्ला अदालतमा भदौ २३ गते बलात्कार शीर्षकमा मुद्दा दर्ता गरेको थियो ।
जिल्ला अदालतको भदौ २४ गतेको आदेशमा आरोपित पुर्पक्षका लागि थुनामा थिए ।
पीडितको स्वास्थ्य परीक्षण मेची अस्पतालमा ०७९ साउन ३१ गते गरिएको थियो ।
६ वर्षीया बालिकालाई बलात्कार गरेको कसुरमा जिल्ला अदालतले शिवसताक्षी नगरपालिका–२ का ३९ वर्षीय भिमबहादुर थापालाई जन्म कैद सजाय, ७ लाख रुपियाँ जरिबाना र १ लाख क्षतिपूर्तिको फैसला सुनाएको छ ।
जिल्ला अदालतका न्यायाधीश मनोजकुमार श्रीवास्तवको ०७९ माघ २६ गतेको इजलासले सो फैसला सुनाएको अदालतका सूचना अधिकारी अर्जुनप्रसाद गुरागाँइले बताउनु भयो ।
पीडित बालिकालाई ०७९ असार ३२ गते बलात्कार गरेको आरोपमा भिमबहादुर थापाविरुद्ध पीडित पक्षले ०७९ साउन १ गते इलाका प्रहरी कार्यालय झिलझिलेमा उजुरी दिएको थियो ।
आरोपितलाई प्रहरीले साउन १ गते घरबाट गिरफतार गरेको थियो ।
आरोपितविरुद्ध प्रहरीले जिल्ला अदालतमा साउन २३ गते बलात्कार शीर्षकमा मुद्दा दर्ता गरी कानूनी कारवाही अगाडि बढाएको थियो ।
जिल्ला अदालतको ०७९ साउन २४ गतेको आदेशमा आरोपित पुर्पक्षका थुनामा थिए ।
पीडितको स्वास्थ्य परीक्षण साउन १ गते मेची अञ्चल अस्पताल भद्रपुरमा गरिएको थियो ।