गौरीगञ्ज गाँउपालिका–३ कृपाल टोलकी १७ वर्षीया सोनीकुमारी राजवंशीलाई आत्महत्या दुरुत्साहन दिएको आरोपमा प्रहरीले माघ २५ गते ४७ वर्षीय शिक्षक पवनकुमार दासलाई गिरफ्तार गरेको छ ।
गौरीगञ्ज गाउँपालिका–३ स्थित गौरीगञ्ज माध्यमिक विद्यालयमा कक्षा ११ मा अध्ययनरत बालिकालाई सोही विद्यालयमा कार्यरत शिक्षक दासले माघ २४ गते अफिसमा बोलाएर कुटपिट गरेको पीडित पक्षको आरोप छ ।
माघ २४ गते साढे तीन बजे शिक्षक दासले बालिकालाई अफिसमा बोलाएर कुटपिट गरेको र साढे चार बजे विद्यालय छुट्टी भएपछि घर फर्किने क्रममा सोनीकुमारीले म भोलीदेखि स्कूल जान्न,आज मेरो अफिसमा धेरै वेइज्जत भएको भनेर ठूली आमाकी छोरी कञ्चन मण्डलसँग भनेको पीडित बालिकाकी आमा देवकी राजवंशीले बताउनु भयो ।
शिक्षक दासका कारण सोनीकुमारीले माघ २४ गते साँझ झुण्डिएर आत्महत्या गरेपनि आरोपित शिक्षकलाई प्रहरीले गिरफ्तार नगरेपछि माघ २५ गते गौरीगञ्ज गाउँपालिकाका स्थानीयले शिक्षक र प्रहरीविरुद्ध नारीबाजी गरी बजार परिक्रमा गरेका छन् ।
शिक्षक दासलाई गिरफ्तार गर्न माग गर्दै नाराबाजीसहित स्थानीयले बजार परिक्रमा गरेका हुन् ।
आरोपित शिक्षकविरुद्ध आत्महत्या दुरुत्साहन दिएको आरोपमा पीडित बालिकाका ठूलो बुवा दारासिंह राजवंशीले माघ २५ गते इलाका प्रहरी कार्यालय गौरीगञ्जमा उजुरी दिएपछि आरोपित शिक्षकलाई अनुसन्धानका लागि गिरफ्तार गरेको प्रहरीले जनाएको छ ।
शवको पोष्टमार्टम माघ २६ गते मेची अस्पतालमा गरिने बालिकाका ठूलो बुवा दारासिंह राजवंशीले बताउनु भएको छ ।