जिल्ला समन्वय समिति महोत्तरीले गाउँपालिका थप गर्ने विषयमा वैशाख १३ गते डाकेको सर्वदलीय बैठकमा राष्ट्रिय जनता पार्टीले विरोध जनाएपछि बैठक स्थगित गरिएको छ ।
राजपाले आफ्नो तयारी पुर्ण नरहेको भन्दै विरोध जनाएपछि एकदिनको लागि बैठक स्थगित गरिएको छ । अब वैशाख १४ गते बिहान ८ बजे सर्वदलीय बैठक डाकिएको जिल्ला समन्वय समितिले जनाएको छ ।
महोत्तरीको कुल जनसङ्ख्या ६ लाख २४ हजार ६ सय ९६ रहेकामा नगरपालिकामा कम्तीमा ३१ हजार र गाँउपालिकामा कम्तीमा २१ हजार जनसङ्ख्याको हिसावमा गाउँ र नगरपालिका थप्न सकिने भएकोमा स्थानीय राजनीतिक दलहरू आ-आफ्नै सुविधा अनुसार थप्ने तयारीमा जुटेको देखिएको छ ।
हालको भद्र सहमति अनुसार ७ देखि १२ गाउँ तथा नगरपालिका थपेर महोत्तरीमा गाँउपालिका र नगरपालिकाको सङ्ख्या दोब्बर बनाउने तयारी गरिएको छ । दलहरूको प्रतिनिधित्वसमेत बढ्ने भएपछि सबै दलहरू आफ्नो हिसावले गाउँहरूको भागबण्डामा लागेका छन् ।
नेपाली काङ्ग्रेस, माओवादी केन्द्र र राजपालगायतका दलहरू आआफ्नै पार्टी कार्यालयमा जिल्लाको नक्सा तथा गाउँहरूको जनसङ्ख्या उल्लेखित विभिन्न दस्तावेजका साथ गाँउपालिका थप्न लागि परेका छन् ।
नेपाल सरकारले दुई चरणमा स्थानीय तहको चुनाव गराउने निर्णय गरेसँगै महोत्तरीमा चुनावी गतिविधि हाललाई रोकिएको छ । चुनावी गतिविधि रोकिएसँगै निर्वाचन अधिकृतहरू आआफ्नो कार्यालयमा फिर्ता भएका छन् । मुख्य निर्वाचन अधिकृतको कार्यालय भने यथावत रहने जिल्ला निर्वाचन कार्यालय महोत्तरीले जनाएको छ ।
नेपाल सरकारले तराई मधेशका ११ जिल्लामा पुनर्विचार गरी गाउँ र नगरपालिका थपिने जनाएपछि दलहरू जनसङ्ख्याको आधारमा महोत्तरीमा गाउँ र नगरपालिका थप गर्न छलफलमा व्यस्त देखिएका हुन् ।
हाल यस्तो छ गाउँ र नगरपालिकाः
निर्वाचनका कार्यहरू रोकिएको छैनः जिल्ला निर्वाचन अधिकृत
जिल्ला निर्वाचन कार्यालय महोत्तरीका अधिकृत पिङ्की रायले महोत्तरीमा दोस्रो चरणमा निर्वाचन हुने भएकोले निर्वाचन अधिकृतहरू फिर्ता भएको बताइन् । उनले दोस्रो चरणमा निर्वाचन गरिने भएकोले हाललाई चुनावका कार्यक्रमहरू केही पछाडि सर्ने तर प्रकृया र चुनावी गतिविधि भने नरोकिने बताइन् । निर्वाचन अधिकृत रायले जिल्लाको मटिहानी र पिपरा गाँउपालिका तथा जलेश्वर नगरपालिकामा मतदाता शिक्षा कार्यक्रम सम्पन्न भएको बताइन् । उनले मतदाता शिक्षा स्वयम्सेवक र निर्वाचन कार्यकर्तालाई तालिमको निरन्तरता दिने र वैशाख २८ गतेदेखि जेठ २२ गतेसम्म उनीहरू गाउँगाउँमा नै रहने बताइन् ।