ईश्वरपुर नपा–३ भक्तिपुरका ५५ वर्षीय वडा अध्यक्ष सुर्यकुमार श्रेष्ठलाई असार ११ गते राति १० बजे हत्या गरेको आरोपमा प्रहरीले ईश्वरपुर नपा–३ का ३५ वर्षीय प्रेमराज दाहाल र जेसिबी चालक बरहथवा नपा–१ का ३८ वर्षीय रविन भनिने हर्कबहादुर तामाङलाई असार १२ गते गिरफ्तार गरेको छ ।
ईश्वरपु नपार–३ भक्तिपुरस्थित मुखलाल बाँधमा गरिएको पोखरी विस्तारको अनुगमन गर्न जाँदा जेसिबीको बकेटले हिर्काएर वडा अध्यक्ष श्रेष्ठको हत्या गरिएको ईश्वरपुर नगरपालिकाका प्रमुख मनोज देवकोटाले आरोप लगाउनु भयो ।
खनिएको पोखरीको अनुगमन गर्न जाँदा वडा अध्यक्ष श्रेष्ठसँग भएको विवादको क्रममा डोजर चालक सहितका आरोपितले वडा अध्यक्षको हत्या गरेको जिल्ला प्रहरी कार्यालय मलङ्गवाका एसपी सन्तोष सिंह राठौरले जानकारी दिनु भयो ।
प्रहरीका अनुसार राति अबेरसम्म वडा अध्यक्ष श्रेष्ठ, जेसिबीका ठेकेदार दाहाल र जेसिबी चालक तामाङले नजिकैको होटलमा सँगै खाजा खाएका थिए ।
खाजा खाएपछि उनीहरूबिच भएको विवादका क्रममा मुखलाल बाँध नजिक पुगेपछि जेसिबी चालक तामाङले जेसिबी चलाएर वडा अध्यक्ष श्रेष्ठलाई जेसिबीको बकेटले ठक्कर दिई हत्या गरेको राठौरले बताउनु भयो ।
प्रहरीले घटनामा संलग्न भएको आरोपमा जेसिबीका ठेकेदार दाहाललाई घटना लगत्तै गिरफ्तार गरेको र घटनापछि फरार रहेका जेसिबीका चालक तामाङलाई असार १२ गते बिहान ६ बजे लालबन्दीबाट गिरफ्तार गरेको एसपी राठौरले जानकारी दिनु भयो ।
शवको पोष्टमार्टमका लागि जिल्ला अस्पताल मलङ्गवामा राखिएको छ ।