राजगढ गाउँपालिका–५ मलेकपुरकी २२ वर्षीया नितुकुमारी दासका पति कमलकुमार दासले अग्नीसाइर कृष्णसवरण गाउँपालिका–६ महुलीकी १८ वर्षीया अनीता भनिने विष्णुमाया राईसँग बालविवाह तथा बहुविवाह गरे पनि जिल्ला प्रहरी कार्यालय सप्तरीले मङ्सिर १ गतेसम्म उजुरी दर्ता नगरेको पीडितले आरोप लगाएकी छन् ।
सामाजिक परम्पराअनुसार २०७३ वैशाख २२ गते आरोपित कमलकुमार दाससँग विवाहिता पीडितका सन्तान छैनन् ।
अग्नीसाइर कृष्णसवरण गाउँपालिका– ६ महुली बजारमा मोबाइल मर्मत पसल सञ्चालन गरी सोही ठाउँमा डेरा गरी बस्ने आरोपित कमलले असोज २६ गते १८ वर्षीया युवतीसँग दोस्रो विवाह गरेका छन् ।
पीडितले आरोपित पति र विष्णुमायासहित विवाह गराउने ससुरा ६० वर्षीया जयनारायण दास, सासू ५५ वर्षीया मीनादेवी दास, नन्द सिरहाको लहान नपा–७ सिंगराहीकी ३७ वर्षीया गङ्गीयादेवी भनिने गङ्गादेवी दासविरूद्ध उजुरी दिएकी छिन् ।
५ लाख रुपियाँ दाइजो दिए घर फर्की आउनु नत्र नआउनु भन्दै ०७५ मङ्सिर २७ गते कुटपिट गरी घरनिकाला गरेदेखि पीडित महादेवा गाउँपालिका–१ स्थित माइतीघरमा बस्दै आएकी छिन् ।
आरोपितहरूले दोस्रो विवाह गरेको स्वीकारेको अडियो रेकर्ड, बालिका उमेर प्रमाणित हुने विद्यालयको प्रमाणपत्र, बालिकाकी दिदीले आरोपित कमलविरूद्ध जिल्ला प्रहरी कार्यालय र उच्च अदालत जनकपुर राजविराज इजलाशमा दिएको परमादेशसहितको प्रमाणका साथ उजुरी लिएर जाँदा समेत उजुरी दर्ता गर्न अस्वीकार गरेको पीडितका बुबा महादेवा गाउँपालिका–१ का कौशलकुमार दासले बताए ।
पीडित र पीडितका बुबासहित इन्सेक प्रतिनिधि मनोहरकुमार पोखरेल, सप्तरी जिल्ला बार एकाईका अध्यक्ष डोमन साह, पूर्व अध्यक्ष एवम् पीडितका ठूलो बुबा केशवप्रसाद दाससहितका कानुन व्यवसायीहरू गत कात्तिक २९ गते र मङ्सिर १ गते उजुरी लिएर जिल्ला प्रहरी कार्यालय सप्तरी गएका थिए ।
जिल्ला प्रहरी कार्यालय सप्तरीको मुद्दा शाखाका इन्स्पेक्टर सन्तोष खड्काले विवाह गरी भारततर्फ भागेका आरोपितहरू नेपालको सीमामा आएको खबर पीडित पक्षले दिएपछि मात्र मुद्दा दर्ता गरिने बताए ।
उनले विवाह गराउन घरपरिवारका अन्य सदस्यहरूको भूमिका नभएकाले उजुरीबाट उनीहरूको नाम हटाउन समेत भनेका छन् ।