बोलाई सम्बन्धी अपाङ्गता भएकी ३६ वर्षीया महिलालाई बलात्कार गरेको आरोपमा पुर्पक्षका लागि थुनामा रहेका शिवसताक्षी नगरपालिका–६, फर्साडाँगीका ४३ वर्षीय डम्बरबहादुर तामाङलाई जिल्ला अदालतले असोज ७ गते आठ वर्ष कैदको सजाय सुनाएको छ ।
न्यायाधीश नारायणप्रसाद पराजुलीको इजलासले तामाङले कसुर गरेको ठहर गर्दै कैद सजाय र पीडितले पाउने गरी ५० हजार रुपियाँ क्षतिपूर्ति भराउन आदेश दिएको छ ।
पीडित महिलालाई आरोपितले ०७५ चैत ११ गते बलात्कार गरेको आरोपमा पीडित पक्षले आरोपित विरूद्घ चैत १७ गते इलका प्रहरी कार्यालय झिलझिलेमा उजुरी दिएको थियो ।
उजुरी लगत्तै आरोपितलाई प्रहरीले गिरफ्तार गरी कानुनी कारवाही अघि बढाएकोमा जिल्ला अदालतको ०७६ वैशाख १० को आदेशमा आरोपित पुर्पक्षका लागि थुनामा रहेका थिए ।
पीडित महिलाको स्वास्थ्य परीक्षण मेची अञ्चल अस्पतालमा चैत १६ गते गरिएको थियो ।