ठोरी गाउँपालिकाका ज्येष्ठ नागरिकले चालू आर्थिक वर्षमा आठ महिनाको सामाजिक सुरक्षा भत्ता पाउन नसकेको आरोप लगाएका छन् ।
नेपाल सरकारले गाउँपालिकामार्फत प्रदान गर्दै आएको सामाजिक सुरक्षा भत्ता गाउँपालिकाले नदिएको ज्येष्ठ नागरिकको गुनासो छ ।
वडा कार्यालयमा जाँदा सचिव नभेटिने, जनप्रतिनिधिलाई सोध्दा आउँछ–आउँछ भनेर टार्ने गरेको ठोरी गाउँपालिका–३ की ८४ वर्षीया ज्येष्ठ नागरिक लक्ष्मी मायाले गुनासो गरिन् ।
‘उखरमउलो गर्मीले मरूँला जस्तो हँुदा एउटा गुल्कोज किनेर खाउँ भने पनि पैसा छैन ।’–उनले भनिन्–‘छोराछोरी घरमा छैनन् औषधिमुलो गर्न सकिएन भत्ता चाँही मरेपछि त आउने होला !’
ठोरी गाउँपालिका–२ का ७५ वर्षीय जितबहादुर बिक आठ महिनासम्म भत्ता नपाएकोमा जनप्रतिनधिहरूसँग आक्रोशित छन् । उनले भत्ता ल्याइदिन फुर्सद नपाएका जनप्रतिनिधिहरूलाई बुढाबुढीको आँसु लाग्ने टिप्पणी गरे ।
जिल्लाका कतिपय स्थानीय तहले अन्तिम चौमासिक भत्तासमेत खुवाइसकेको अवस्थामा ठोरी गाउँपालिकाले पहिलो किस्ताबाहेक भत्ता खुवाउन नसकेको भन्दै गाउँका बासिन्दाले असन्तुष्टि व्यक्त गरेका छन् । भत्ता पाउने आस गर्दा गर्दै कैयन ज्येष्ठ नागरिकको मृत्यु भइसकेको उनीहरूले बताए ।
ज्येष्ठ नागरिक, विधवा, एकल महिला, अपाङ्ग, लोपोन्मुख आदिवासी जनजाति तथा दलित बालबालिकाले सामाजिक सुरक्षा भत्ता पाउँछन् ।
स्थानीय तहले चार–चार महिनामा एक वर्षमा तीन किस्तामा भुक्तानी दिनुपर्ने सामाजिक सुरक्षा भत्ताको पहिलो किस्ता हरेक वर्ष असोज १ गतेदेखि १५ गतेसम्म वडा कार्यालयमार्फत लाभग्राहीलाई भुक्तानी दिइसक्नुपर्ने सामाजिक सुरक्षा कार्यविधि २०७५ ले व्यवस्था गरेको छ ।
त्यसैगरी दोस्रो चौमासिक माघ १ गतेदेखि १५ गतेभित्र र अन्तिम चौमासिक जेठ १ गतेदेखि १५ गतेभित्र वितरण गरिसक्नुपर्नेछ । अन्तिम चौमासिकसम्म पनि भत्ता वितरण नगरिए रकम स्वतः ल्याप्स हुने व्यवस्था छ ।
ठोरी गाउँपालिकाका लाभग्राहीले पहिलो चार महिनाको मात्र रकम पाएको र आठ महिनाको रकम वितरण गर्ने समयसमेत कटिसकेको हुँदा सो रकम ‘फ्रिज’ हुने सम्भावना बढ्दै गएको कोष तथा लेखा नियन्त्रण कार्यालयका एक अधिकारीले बताएका छन् ।
‘सामाजिक सुरक्षा जस्तो संवेदनशील विषयमा कुनै समस्या छैन । एक किस्ताको भरपाई पठाउनेबित्तिकै अर्को किस्ता निकासाको प्रक्रिया अगाडि बढिहाल्छ । भरपाइ नै आउन नसक्नु भनेको स्थानीय तहको अकर्मण्यता हो ।’–ती अधिकारीले भने ।
यस सम्बन्धमा ठोरी गाउँपालिकाका अध्यक्ष पद्मबहादुर श्रेष्ठले वडा सचिव अभावका कारण सामाजिक सुरक्षा भत्ता वितरण गर्न नसकेको बताए ।
बैङ्कबाट भता वितरण गर्ने प्रयास गरेपनि गाउँपालिकास्थित राष्ट्रिय वाणिज्य बैङ्कले नसक्ने प्रतिक्रिया दिएको अध्यक्ष श्रेष्ठको भनाई छ । उनले सामाजिक सुरक्षा भत्ता शीर्षकको रकम फ्रिज हुने बताए ।
गाउँपालिकाका प्रमुख प्रशासकीय अधिकृत धर्मराज थापाले भने चालू आर्थिक वर्षभित्र यस वर्षको भत्ता वितरण नभए फ्रिज हुने बताए ।
गाउँपालिकाका पाँच ओटा वडामध्ये वडा नं ५ बाट भत्ता वितरणको भरपाई गाउँपालिकामा पेश भएकोले सो वडामा १२ महिनाको भत्ता निकासा दिएको र बाँकी चार ओटा वडाबाट पहिलो चौमासिकको भरपाई गाउँपालिका कार्यालयमा नआएकोले भत्ता निकासा नभएको अधिकृत थापाले बताएका छन् ।