जेनजी अभियानता माजिद अन्सारीमाथि कुटपिट गरी प्रहरीले नियन्त्रणमा लिएको घटनामा राष्ट्रिय मानव अधिकार आयोगमा जेनजी मुभमेन्ट अलायन्सले उजुरी दिएको छ।
जेनजी मुभमेन्ट अलायन्सले ०८३ असार २९ गते आयोगमा सरकार, गृह प्रशासन र प्रहरी विरूद्ध इमेलमार्फत उजुरी आएको आयोगका उपसचिव एवम् सहायक प्रवक्ता श्यामबाबु काफ्लेले बताउनु भयो ।
अलायन्सले कीर्तिपुरको होल्डिङ सेन्टरमा गएका अन्सारीमाथि कुटपिट गर्ने प्रहरी टोली र प्रधानमन्त्री कार्यालय/ गृह मन्त्रालयबाट समन्वय गरी पठाइएको प्रतिनिधि बताउने ओजस्वी थापा विरूद्ध उजुरी परेको छ । थापाले त्यसदिन प्रहरीलाई निर्देशन दिएर परिचालन गरेको आरोप छ ।
त्यसैगरी संविधानको धारा १६, १७, २० र २२ को विपरीत मानव अधिकारको उल्लङ्घन गरेको उजुरीमा उल्लेख छ । विचार तथा अभिव्यक्तिको स्वतन्त्रता, बिना हातहतियार शान्तिपूर्वक भेला हुने स्वतन्त्रता, सम्मानपूर्वक बाँच्न पाउने हक, लगायतविरूद्ध अन्सारीमाथि कुटपिट गरी नियन्त्रणमा लिएको भन्दै उजुरी परेको हो ।
अलायन्सले त्यस दिनको भिडिओ, कीर्तिपुर अस्पतालको रिपोर्ट र टिचिङ अस्पतालको रिपोर्ट पनि आयोगलाई बुझाएको छ । हाल अन्सारी उपचारका लागि त्रिवि शिक्षण अस्पताल महाराजगन्जमा रहेको उजुरीमा उल्लेख छ ।