लुम्बिनी प्रदेश सभाले थारू समुदायका प्रथाजनित परम्पराको संरक्षण तथा प्रवर्धन गर्ने सम्बन्धमा व्यवस्था गर्न बनेको विधेयक २०८३ सर्वसम्मत रूपमा पारित गरेको छ ।
लुम्बिनी प्रदेश थारु समुदायको उल्लेख्य बसोबास रहेको र उनीहरुका प्रथाजन्य संस्कृति, परम्परालाई संरक्षण गर्न विधेयक पारित भएपछि कानुनी आधार तयार भएको छ । प्रदेश सभाको आठौं अधिवेशनअन्तर्गत असार २४ गते बसेको १८ औं बैठकमा सामाजिक विकास मन्त्री जन्मजय तिमिल्सिनाले उक्त विधेयक पारित गरियोस् भन्ने प्रस्ताव प्रस्तुत गर्नुभएको थियो । उक्त प्रस्तावलाई निर्णयार्थ प्रस्तुत गर्दै सभामुख तुलाराम घर्तीमगरले विधेयक सर्वसम्मत रूपमा पारित भएको घोषणा गर्नुभयो ।
थारू समुदायमा परम्परागत रूपमा प्रचलित कविला गण संरचना, संगठन, चालचलन, रीतिरिवाज, संस्कृति, सम्पदा, मटावाँ, बरघर तथा भलमन्सालगायतका मौलिक परम्पराको पहिचान, अभिलेखीकरण, संरक्षण, प्रवर्धन तथा पुस्तान्तरणका लागि आवश्यक कानुनी व्यवस्था गर्ने उद्देश्यले उक्त विधेयक ल्याइएको थियो । पारित विधेयक थारू समुदायका प्रथाजनित परम्पराको संरक्षण तथा प्रवर्धन सम्बन्धी ऐन, २०८३ का रूपमा तत्काल लागू हुनेछ । यो ऐन प्रदेशभित्र थारू समुदायको बसोबास रहेका क्षेत्रमा कार्यान्वयन हुने व्यवस्था गरिएको छ ।