बेपत्ताको अवस्था सार्वजनिक नभएपछि शान्ति सम्झौता भएको दिन पारेर राज्य पक्षले बेपत्ता पारेको बर्दियाको बारबर्दियामा नगरपालिका– ११ बेलभारका २४ वर्र्षीय चैतेलाल चौधरी र पत्नी सिताजानकी चौधरीको धागोको शव बनाएर दाहसंस्कार गरिएको छ । उनीहरुलाई राज्यपक्षले २५ वर्ष अगाडि बारबर्दिया नगरपालिका–५ जब्दहवाबाट बेपत्ता पारेको थियो ।
फुपुको घरबाट साइकलमा घर आउँदै गर्दा बारबर्दिया नगरपालिका– ५ मा पर्ने जब्दहवा गाउँबाट तत्कालिन नेपाली सेनाको टोलीले दाइ भाउजूलाई २०५८ साल पुस ५ गते गिरफ्तार गरी बेपत्ता पारेको भाइ भागीराम चौधरीले बताउनु भयो ।
हालसम्म पनि दाइ भाउजूको अवस्था सार्वजनिक हुन नसकेपछि सामाजिक र सांस्कृतिक दबाब, राजनीतिक अस्थिरका कारण धागोको शव बनाएर अन्तिम संस्कार गरिएको हो ।’ उनले भने, ‘दाइ भाउजूको दाहसंस्कार थारू संस्कृति अनुसार गरेका छौँ । काजकिरिया गरेपनि राज्यले बेपत्ता पारिएकाहरुको अवस्था सार्वजनिक गरिदियोस् भन्ने चाहना रहेको उहाँले बताउनु भयो ।
विस्तृत शान्ति सम्झौता २०६३ मङ्सिर ५ गते भएको थियो । शान्ति सम्झौतामा बेपत्ता अवस्था ६ महिना भित्र सार्वजनिक गर्ने सहमति भएको थियो । तर शान्ति सम्झौता भएको २० वर्ष हुँदा समेत राज्य पक्षले बेपत्ताको अवस्था सार्वजनिक गर्न चाहेको छैन् । द्वन्द्वकालका राज्यपक्ष र माओवादी गरी बर्दियाबाट २ सय ५४ जनालाई बेपत्ता पारिएको थियो ।