मधेस आन्दोलनको क्रममा मारिएका सशस्त्र प्रहरीका असई थमन बिकको हत्यासम्बन्धी मुद्दाको पेसी उच्च अदालत जनकपुरमा लगातार सर्दै आएको छ ।
पछिल्लो पटक पुस १९ गते बिहीबार जनकपुर उच्च अदालतको बेन्च नम्बर २ मा परेको पेसी १० औँ पटक सारिएको छ । यसअघि १२ पुसमा तोकिएको पेसी पनि सारिएको थियो ।
सो मुद्दाको पेसी पुस २६ गतेकालागि तोकिएको उच्च अदालत जनकपुरका प्रवक्ता रमाकान्त यादवले जानकारी दिए ।
२५ भदौ ०७२ मा मधेस आन्दोलनका क्रममा महोत्तरीमा कार्यरत सशस्त्र प्रहरीका असई थमन विकको हत्या भएको थियो ।
बिकलाई आन्दोलनकारीहरूले सुरूमा जलेश्वरमा कुटपिट गरी गम्भीर घाइते बनाएका थिए । उनको उपचार जलेश्वर अस्पतालमा सम्भव नभएपछि थप उपचारको लागि जनकपुर अञ्चल अस्पताल लैजाने क्रममा महोत्तरी गाउँपालिका स्थित सोनउखडा भन्ने स्थानमा एम्बुलेन्सबाट थुतेर आन्दोलनकारीहरूले खेतमा लगी निर्घाट कुटपिट गरी मारेका थिए ।
सो मुद्दामा २८ साउन ०७५ मा जिल्ला अदालत महोत्तरीले अभिराम शर्मा, रामाशङ्कर मिश्र, सुरेन्द्र पाण्डेय, धमेन्द्र रायलगायत २८ जनामाथि मुद्दा दर्ता गरेको थियो ।
तीमध्ये शर्मा प्रदेश सरकारका सामाजिक विकास राज्यमन्त्री छन् भने मिश्र जलेश्वर नगरपालिकाका मेयर छन् । मिश्र, पाण्डेय, राय साधारण तारेकमा रिहा भइसकेका छन् ।
महोत्तरी जलेश्वर नगरपालिका–३ का सञ्जयकुमार साह र जलेश्वर–२ का प्रदीप साह माझी पुर्पक्षका लागि जेलजीवन बिताइरहेका छन् ।
२८ साउनमा जिल्ला अदालत महोत्तरीले गरेको आदेशमा त्रुटी भएको भन्दै सरकारी वकिल कार्यालय महोत्तरीले ११ असोज ०७५ मा उच्च अदालत जनकपुरमा रिट दायर गरेको छ ।
साधारण तारेखमा छुटेका आरोपितहरूलाई थुनामा राखेर अनुसन्धान गर्नुपर्ने मागसहित सरकारी वकिलले उच्च अदालतमा रिट दायर गरेको हो । तर, सो मुद्दामा उच्च अदालत जनकपुरले पटक–पटक पेसी तोके पनि अहिलेसम्म सुनवाइ हुन सकेको छैन ।
उच्च अदालत जनकपुरका प्रवक्ता रमाकान्त यादवले अहिलेसम्म सो मुद्दाको १० ओटा पेसी तोकिएको भएपनि आरोपिततर्फका कानुन व्यवसायीहरूले पटकपटक मुद्दाको पेसी सार्दै आएको बताए ।