नेपाल विद्युत प्राधिकरण कार्यालय, भरतपुर वितरण केन्द्रको डिजिटल बोर्डमा प्रधानमन्त्रीविरुद्ध अपशब्द डिस्प्ले भएको भन्दै ०८१ चैत १२ गते कार्यालय प्रमुख राजु श्रेष्ठको कार्यकक्षमा अज्ञात पक्षले तोडफोड गरेको छ ।
जिल्ला प्रहरीमा तोडफोडको जानकारी आएको तर कसले गर्यो भनेर किटानी जाहेरी नआएको चितवन प्रहरी प्रमुख एसपी राजन लिम्बूले बताउनुभयो ।
जिल्ला प्रशासन कार्यालय चितवनले प्रधानमन्त्री विरुद्ध सरकारी कार्यालयकै बोर्डमा अपशब्दलेखिएको विषयमा कार्यालय प्रमुखलाई २४ घण्टे स्पष्टिकरण सोधेको छ ।
कार्यालयको डिजिटल बोर्डमा अपशब्द लेखिएपछि कार्यालय प्रमुख सहित कर्मचारी छानबिनको दायरामा आएका हुन् । प्रमुख जिल्ला अधिकारी प्रकाश पौडेलले घटनाका सम्बन्धमा स्पष्टिकरण सोधेर कारबाही प्रकृया अगाडि बढाइएको बताउनुभयो ।
नेपाल विद्युत प्राधिकरण कार्यालय, भरतपुरले चैत १२ गते नै विज्ञप्ति प्रकाशन गरेर डिजिटल बोर्ड ह्याक भएको दाबी गरेको छ ।