जिल्लाको दुर्गम भोटखोला गाउँपालिकामा पाँच ओटा वडाको सेवा एक जना वडासचिवले मात्र प्रवाह गर्नुपर्ने अवस्था रहेका कारण सेवाग्राहीले सास्ती पाएको गुनासो गरेका छन् ।
भोटखोलामा एक जना वडासचिव मात्र हुँदा समयमा सेवा नपाएको भोटखोला गाउँपालिका–२ का ३२ वर्षीय सुवास भोटेले गुनासो गर्नु भयो ।
उहाँले भन्नुभयो “गाउँपालिका पाँच ओटा वडा मिलेर बनेको छ, वडासचिव भने एक जना मात्रै हुनुहुन्छ, जसका कारण हामीले सेवा पाउन सास्ती हुनुका साथै लामोसमय पर्खिनु पर्छ ” एक जना वडासचिवले पाँच ओटै वडाको सेवा प्रवाह गर्न गर्नुपर्दा समस्या हुने गरेको गुनासो स्थानीयको छ ।
दुर्गम र विकट गाउँपालिका भएकाले दरबन्दी अनुसारका कर्मचारी कार्य क्षेत्रमा बस्दैनन् । गाउँपालिका २७ जना कर्मचारीको दरबन्दी भएपनि करारमा नियुक्त पाँच जना कर्मचारीले आलोपालो गरी सेवा प्रवाह गर्दै आएको गाउँपालिका कार्यालयले जनाएको छ ।
भौगोलिक रूपमा अति नै विकट भएपनि कर्मचारी नबस्दा एउटै सचिवले पाँच ओटा वडाको काम गर्नु परेको वडासचिव दावा लामाले इन्सेक प्रतिनिधिसँगको फोन सम्पर्कमा बताउनु भयो । भोटखोला गाउँपालिकामा ६ हजार ५ सय ७६ जनाको वसोवास रहेको छ ।
सडक सञ्जाल समेत नपुगेको भोटखोलाकाको पाँच ओटै वडा हिँडेर पुग्नु पर्न बाध्यता रहेको सचिव लामाले बताउनु भयो । भौगोलिक विकटताका कारण कर्मचारी हिडेर समयमा कार्यालय नपुग्ने हुँदा सेवा प्रवाहमा समस्या भएको वडासचिव लामाले बताउनु भयो ।
स्थायी कर्मचारी नबस्ने र करारका कर्मचारीले आलोपालो सेवा प्रवाह गर्दा सोचे जस्तो काम गर्न नसकेको भोटखोला गाउँपालिका अध्यक्ष तेम्बा भोटेले बताउनु भयो ।
उहाँले सरकारले गाउँगाउँमा सिंह दरबार भनेपनि कर्मचारी सदरमुकाम केन्द्रीत हुँदा सेवाग्राहीले सास्ती खप्नु परेको बताउनु भयो ।
भोटखोला क्षेत्र भौगोलिक विकटता भएकाले कमचारी जान नमान्ने गाउँपालिका अध्यक्ष तेम्बा भोटेले गुनासो गर्नुभयो । सदरमुकाम खाँदबारीदेखि ३० कोष टाढा रहेको भोटखोला गाउँपालिका चीन सँग जोडिएको छ ।