मुसिकोट नगरपालिका–४ बडागाउँ दोभानकी ३४ वर्षीया लाली कुमाललाई दाउराको चिर्पट प्रहार गरी हत्या गरेको आरोपमा प्रहरीले लालीका पति पङ्कज कुमाललाई कात्तिक ३ गते गिरफ्तार गरेको छ ।
अत्यधिक मदिरा सेवन गरेका पङ्कजले कात्तिक ३ गते राति करिव साढे आठ बजे पत्नीलाई चिर्पट प्रहार गरी घाइते बनाएको जिल्ला प्रहरी कार्यालय गुल्मीका एसपी दिपककुमार बस्नेतले जानकारी दिए ।
लालीको टाउको र शरीरका विभिन्न भागमा चोट लागेपछि उपचारको लागि तम्घास ल्याउँदै गर्दा बाटोमै मृत्यु भएको एसपी बस्नेतले बताए ।
पङ्कजले पहिले पनि घरमा पत्नी र बृद्धा आमालाई कुटपिट गर्ने र अरू अपराधिक क्रियाकलाप गरेर दुःख दिने गरेको मुसिकोट नगरपालिका–४ का वडा सदस्य टीका गुरुङले बताए । शवको पोष्टमार्टम कात्तिक ४ गते जिल्ला अस्पताल तम्घासमा गरिने प्रहरीले जनाएको छ ।