जेनजी आन्दोलनका क्रममा ज्यान गुमाएकाहरु मध्ये ४५ जनालाई सरकारले ०८२ कात्तिक १७ गते शहीद घोषणा गरेकोमा मधेश प्रदेशका तीन जना शहीद घोषणा भएका छन् ।
शहीद घोषणा गरिएका मध्ये पर्सा जिल्ला वीरगञ्ज महानगरपालिका–१२ का २४ वर्षीय असहाव आलम ठाकुराई, सिरहा जिल्ला लहान नगरपालिका–१५ का २६ वर्षीय विजय चौधरी र सर्लाही जिल्ला लालबन्दी नगरपालिका–५ का ३१ वर्षीय देवकुमार सुवेदी रहेका छन् ।
जेनजी आन्दोलनको क्रममा ठाकुराईको बानेश्वरमा प्रदर्शनका क्रममा भदौ २३ गते प्रहरीको गोली लागी मृत्यु भएको थियो । भदौ २३ गते बानेश्वरमा प्रदर्शनका क्रममा प्रहरीको गोली लागेर घाइते भएका चौधरीको उपचारको क्रममा भदौ २४ गते मृत्यु भएको थियो । त्यसैगरी सुवेदीको भदौ २४ गते कालिमाटीमा आन्दोलनका क्रममा प्रहरीको गोली लागेर मृत्यु भएको थियो ।
राष्ट्रहित, सुशासन तथा भ्रष्टाचार नियन्त्रणका माग राखेर जेनजीहरूले ०८२ भदौ २३ र २४ गते प्रदर्शन गरेका थिए । प्रदर्शनका क्रममा पर्सा, सिरहा र सर्लाहीका गरी मधेश प्रदेशका तीन जनाको मृत्यु भएको थियो ।
‘खासगरी गृह मन्त्रालय अन्तर्गत रहेको समिति र अन्य सुरक्षा निकाय, जिल्ला प्रशासन कार्यालयबाट आएको अध्ययनबाट ४५ जना व्यक्तिलाई शहीद घोषणा गरिएको सञ्चार मन्त्री जगदीश खरेलले बताउनु भएको छ ।