१३ वर्षीया बालिकालाई यौन दुव्र्यवहार गरेको कसुरमा फरार रहेका गेरुवा गाउँपालिका –१ बनजरियाका ३३ वर्षीय सिताराम थारूलाई प्रहरीले ०८२ भदौ १३ गते गिरफ्तार गरेको छ ।
जिल्ला अदालतका न्यायाधीश मनोज श्रेष्ठको ०८१ मङ्सिर २४ गतेको इजलासले थारूलाई ६ महिना ५ दिन कैद सजाय, ७५ हजार रुपियाँ क्षतिपूर्ति, ४ सय रुपियाँ पीडित राहतकोष र १० हजार रुपियाँ जरिबानाको फैसला गरेको थियो । अदालतले कसुर ठहर गर्दै सजाय तोकेपछि थारु फरार रहेका थिए ।
सजाय पाएर फरार रहेका कसुरदार थारुलाई प्रहरीले ०८२ भदौ १३ गते गुलरिया नगरपालिका – ६ स्थित बजारबाट गिरफ्तार गरिएको जिल्ला प्रहरी कार्यालयका इन्स्पेक्टर कृष्ण डाँगीले जानकारी दिनुभयो । उहाँले भन्नुभयो, ‘फरार रहेका कसुरदारलाई गिरफ्तार गरी भदौ १५ गते अदालतमा पेश गरिएको छ ।’
आरोपितले बालिकालाई ०८० चैत १७ गते यौन दुव्र्यवहार गरेको भन्दै पीडित पक्षले चैत १८ गते इलाका प्रहरी कार्यालय पाताभारमा उजुरी दिएका थिए । प्रहरीले आरोपितलाई चैत १८ गते गिरफ्तार गरेको थियो । पीडितको स्वास्थ्य परीक्षण चैत १८ गते बर्दिया जिल्ला अस्पतालमा भएको थियो ।
सरकारी वकिल कार्यालय बर्दियाले २०८१ वैशाख १२ गते बर्दिया जिल्ला अदालतमा बाल यौन दुरुपयोग गरेको अभियोगमा मुद्दा दर्ता गरेको थियो । अदालतले वैशाख १३ गते थारुलाई धरौटीमा रिहा गरेको थियो ।