१२ वर्षीया बालिकालाई यौन दुर्व्यवहार गरेको कसुरमा जिल्ला अदालतले मायादेवी गाउँपालिका–६ का २३ वर्षीय मनिष कुर्मीलाई नौ वर्ष कैद सजायको फैसला गरेको छ ।
जिल्ला अदालतका न्यायाधीश कृतबहादुर बोहोराको ०८२ साउन २ गतेको इजलासले आरोपितलाई कसुर ठहर गर्दै नौ वर्ष कैद सजाय, ३ लाख ५० हजार रुपियाँ जरिबाना, १० हजार रुपियाँ क्षतिपूर्ति पीडितलाई भराइ दिने र जरिबाना बापतको ३ लाख ५० हजार रुपैयाँ पनि पीडितलाई भराइदिने फैसला गरेको जिल्ला अदालतका स्रेस्तेदार कमल कुमार आचार्यले जानकारी दिनुभयो ।
पीडित पक्षले ०८१ पुस २९ गते यौन दुर्व्यवहार गरेको भन्दै ०८१ माघ १ गते जिल्ला प्रहरी कार्यालयमा उजुरी दिएका थिए ।
पीडितको स्वास्थ्य परीक्षण माघ २ गते कपिलवस्तु अस्पताल तौलिहवामा भएको थियो । प्रहरीले आरोपितलाई माघ १ गते घरबाटै गिरफ्तार गरेको थियो ।