राजावादी आन्दोलका क्रममा ०८१ चैत १५ गते तीनकुने घटनामा संलग्न रहेकाे भन्दै फरार सूचीमा रहेका तीन जना आरोपीहरु ०८२ असार २५ गते आफै काठमाडौँ जिल्ला अदालतमा उपस्थित भएका छन् । उपस्थित तीन जनामध्ये विनञ्यजन थापा र राजेन्द्र जिसीलाई १५/१५ हजार रुपियाँ धरौटीमा रिहा गिरएको छ भने सतीश न्यौपानेलाई पुर्पक्षका लागि थुनामा पठाएको जिल्ला अदालत काठमाडौँले जनाएको छ ।
न्यायाधीश बालकृष्ण वाग्लेको इजलासले थुनामा पठाउने आदेश भएसँगै न्यौपानेलाई डिल्लीबजार कारागर लगिएको छ ।
जिल्ला सरकारी वकिलको कार्यालय काठमाडौँले गत चैत १५ गते राजावादीको प्रदर्शनका क्रममा तीनकुनेमा भएको घटनाका आरोपीविरुद्ध जेठ ११ गते मुद्दा दायर गरेको थियो ।
अवाञ्छित गतिविधि गरेको आरोपमा ६१ जनाविरुद्ध जिल्ला अदालत काठमाडौँ र चार नाबालिगविरुद्ध बाल अदालतमा मुद्दा दायर भएको थियो । ११ जनालाई फरार प्रतिवादी बनाएर मुद्दा दायर भएको थियो ।
उनीहरुविरुद्ध राज्यविरुद्धको कसुर, आपराधिक उपद्रव, कर्तव्य ज्यान, ज्यान मार्ने उद्योग र सङ्गठित अपराधको कसुरमा मुद्दा चलाइएको थियो ।