१४ वर्षीया बालिकालाई बलात्कार गरेको कसुरमा जिल्ला अदालतले तुलसीपुर उमनपा–१५ का ५५ वर्षीय सिताराम नेपाली सार्कीलाई १८ वर्ष कैद गर्ने फैसला गरेको छ ।
जिल्ला अदालतका न्यायाधीश रोमाकान्त ज्ञवालीको ०८२ वैशाख १५ गतेको इजलासले दोषी ठहर गर्दै १८ वर्ष कैद सजाय, ७ लाख रुपियाँ जरिबाना, २५ हजार रुपियाँ क्षतिपूर्ति र २ हजार २ सय रुपियाँ पीडित राहत कोषमा जम्मा गर्ने फैसला गरेको अदालतका स्रेस्तेदार दामोदर घिमिरेले जानकारी दिनुभयो ।
सार्कीले ०८१ भदौ २ गते बलात्कार गरेको भन्दै पीडित पक्षले भदौ ११ गते जिल्ला प्रहरी कार्यालयमा उजुरी दिएका थिए । पीडितको स्वास्थ्य परीक्षण भदौ ११ गते राप्ती स्वास्थ्य विज्ञान प्रतिष्ठान, घोराहीमा भएको थियो । प्रहरीले आरोपितलाई भदौ १३ गते गिरफ्तार गरेको थियो ।