सुनापति गाउँपालिका–५ खनियापानीमा गत असोज महिनामा आएको बाढी पहिरोले क्षति पुर्याएको खानेपानी आयोजना मर्मत नहुँदा ९० घरपरिवारलाई खानेपानीको समस्या भएको छ ।
स्थानीय रामकुमार खड्काका अनुसार असोज ११ र १२ गतेको वर्षाले लाम्पाते लिफ्ट खानेपानी आयोजनाको मुहान नै बगाएको छ । खानेपानीको मुहान बगाउँदा ९० घरपरिवार भन्दा बढी खानेपानी सुविधाबाट वञ्चित भएका छन् । जसले गर्दा सिंगो बस्तीमा नै खानेपानीको अभाव भएको छ । सुक्खा मौसम सुरुभएसँगै साना खानेपानीको मुहान सुकेपछि स्थानीयलाई पानीको हाहाकार भएको खड्काले बताउनु भयो ।
त्यस्तै, सुनापति गाउँपालिका– १ गुन्सीमा पनि बाढी पहिरोले बगाएको खानेपानी योजना मर्मत नहुँदा स्थानीयलाई पानीको संकट परेको छ । स्थानीय मानबहादुर क्षेत्रीका अनुसार तल्लो माझी बस्ती खहरे खोलाले लिफ्ट खानेपानीमा क्षति पुर्याएपछि स्थानीय खानेपानीको सुविधाबाट बञ्चित भएका छन् । सो खानेपानी योजना मर्मतको लागि वडा कार्यालय र गाउँपालिकामा अनुरोध गरिएको भए पनि अहिलेसम्म मर्मत हुन नसकेको स्थानीयको गुनासो छ ।
गएको भदौ र असोज महिनामा आएको बाढी पहिरोले रामेछापको सुनापति, दोरम्बा, खाँडादेवी लगायतका गाउँपालिकामा धेरै खानेपानी योजनामा क्षति पु¥याएको छ । ती मध्ये अधिकांश खानेपानी आयोजनाको मर्मत हुन नसक्दा स्थानीयले खानेपानीको समस्या झेलिरहेका छन् ।