मानव अधिकार उल्लङ्घन तथा ज्यादतीका घटनाहरूको तथ्याङ्कलाई विश्लेषणात्मक रूपमा प्रस्तुत गर्नुपर्नेमा आवश्यकता रहेको इन्सेकका अध्यक्ष डा. कुन्दन अर्यालले बताउनु भएको छ ।
इन्सेकद्वारा ०८१ चैत ८ गते चितवनमा आयोजित नेपाल मानव अधिकार वर्ष पुस्तकको कार्यशालामा मन्तव्य राख्दै डा. अर्यालले मानव अधिकार उल्लङ्घनका तथा ज्यादतिका तथ्याङ्कलाई व्यवस्थित र गहन विश्लेषणसहित प्रस्तुत गर्दा प्रभावकारी हुने धारणा व्यक्त गर्नुभयो ।
कार्यक्रममा उहाँले मानव अधिकार उल्लङ्घनका घटनाहरूको प्रामाणिकता सुनिश्चित गर्न विस्तृत अनुसन्धान र तथ्याङ्क सङ्कलन प्रक्रियालाई अझ प्रभावकारी बनाउन इन्सेक प्रतिबद्ध रहेको उल्लेख गर्नुभयो ।
त्यस्तै इन्सेकका कार्यकारी निर्देशक विजयराज गौतमले इन्सेकले सन् १९९२ देखि नेपाल मानव अधिकार वर्ष पुस्तक प्रकाशन गर्दै आएको बताउनु भयो । उहाँले इन्सेकले प्रकाशन गर्ने सबै विवरणहरू डिजिटलाइज गर्नुपर्नेमा जोड दिनुभयो । उहाँले आगामी दिनमा ढाँचा परिवर्तन गरी अगाडि बढ्न सके अझ प्रभावकारी हुने बताउनु भयो ।
सञ्चारविद् विनोद भट्टराईले नेपाल मानव अधिकार वर्ष पुस्तक आगामी दिनमा परिमार्जन गर्नुपर्नेमा जोड दिनुभयो । उहाँले नेपाल मानव अधिकार वर्ष पुस्तकको विषयवस्तु र गुणस्तरमा समयसापेक्ष रुपमा परिमाजर्न गर्नुपर्ने बताउनु भयो ।
मानव अधिकार प्रलेख तथा पैरवी विभागका प्रमुख मदन पौडेलले आगामी दिनमा नेपाल मानव अधिकार वर्ष पुस्तकलाई कसरी प्रभावकारी बनाउन सकिन्छ भन्ने विषयमा छलफल आवश्यक रहेको प्रष्ट पार्नुभयो । उहाँले नेपाल मानव अधिकार वर्ष पुस्तकको परिमार्जित ठाँचा तथा आगामी योजनाको बारेमा प्रस्तुत गर्नुभएको थियो ।
कार्यक्रममा वर्ष पुस्तकको महत्त्व, यसको सामग्रीको प्रभावकारिता र आगामी दिनमा सुधार गर्नुपर्ने विषयमा पनि छलफल भएको थियो । इन्सेकले हरेक वर्ष मानव अधिकार उल्लङ्घन तथा ज्यादतीका घटनाहरूको अभिलेख राख्दै यसलाई नेपाल मानव अधिकार वर्ष पुस्तकमार्फत सार्वजनिक गर्दै आएको छ ।
