निर्वाचन आयोगले राष्ट्रिय प्रजातन्त्र पार्टी(प्रजातान्त्रिक) का महामन्त्री तथा उक्त पार्टीको तर्फबाट प्रतिनिधि सभा सदस्यको समानुपातिक तर्फका उम्मेदवार ध्रुवबहादुर प्रधानले आचारसंहिता उल्लङ्घन गरेकोमा २४ घण्टा भित्रमा स्पष्टीकरण पेश गर्न निर्देशन दिएको छ ।
मौन अवधि शुरू भइसकेको अवस्थामा सामाजिक सञ्जाल फेसबुकमार्फत आफ्नो र आफ्नो पार्टीको निर्वाचन चिन्ह राखी प्रचारप्रसार गरेको र उक्त कार्य निर्वाचन आचारसंहिता विपरीत देखिएका कारण महामन्त्री प्रधानसँग मङ्सिर १० गते आयोगले २४ घण्टा भित्र स्पष्टीकरण पेश गर्न निर्देशन दिएको आयोगका सहसचिव एवम् प्रवक्ता नवराज ढकालले बताए ।
‘यहाँलाई निर्वाचन आचारसंहिता उल्लङ्घन गरेबापत कारबाही हुनु पर्ने हो/होइन ? पत्र प्राप्त भएको मितिले २४ घण्टाभित्र स्पष्टीकरण पेश गर्नु हुन निर्वाचन आचारसंहिता केन्द्रीय अनुगमन समितिको मिति २०७४।८।१० को निर्यण अनुसार अनुरोध छ ।’-आयोगले महामन्त्री प्रधानलाई सोधेको स्पष्टीकरणमा भनिएको छ ।
यसैगरी आयोगले रत्नराज्य माध्यमिक विद्यालय, बानेश्वरका प्रधानाध्यापक डा. गीता खरेललाई २४ घण्टाभित्रमा आयोगको कार्यालयमा उपस्थित हुन निर्देशन दिएको छ ।
सामाजिक सञ्जाल यूट्यूबमार्फत काठमाडौँ क्षेत्र नम्बर १ को प्रतिनिधिसभा सदस्यमा नेपाली काङग्रेसका उम्मेदवार प्रकाशमान सिंहको पक्षमा खरेलले मत मागी निर्वाचन आचारसंहिता उल्लङ्न गरेको विषयमा आयोगबाट स्पष्टीकरण माग गरिएको थियो ।
आयोगले सोधेको स्पष्टीकरणको जबाफ खरेलले पठाइसकेको भए पनि त्यस सम्बन्धमा थप कुरा बुझ्नु पर्ने भएकाले आयोगकै कार्यालयमा उपस्थित हुन निर्देशन दिएको हो ।