अनौपचारिक क्षेत्र सेवा केन्द्र (इन्सेक) गण्डकी प्रदेश कार्यालयका संयोजक शिवप्रसाद खकुरेललाई मानव अधिकारको क्षेत्रमा योगदानको कदर गर्दै पोखरामा आयोजित एक कार्यक्रममा सम्मान गरिएको छ ।
आप्रवासनसम्बन्धी अन्तर्राष्ट्रिय दिवसको अवसरमा पोखरा महानगरपालिकाको व्यवसाय प्रवर्धन केन्द्रले आयोजना गरेको कार्यक्रममा एसिया मानव अधिकार तथा सांस्कृतिक विकास मञ्च (एसियन फोरम)को समन्वयमा गरिएको कार्यक्रममा पुस ३ गते खकुरेललाई सम्मान गरिएको हो ।
मानव अधिकारको संरक्षण र प्रवर्धनमा पुर्याएको योगदानको मूल्याङ्कन गर्दै उहाँलाई प्रमाणपत्र र फूलमालासहित सम्मानित गरिएको हो । प्रदेश नीति तथा योजना आयोगका सदस्य दीपक भण्डारीले खकुरेललाई प्रमाणपत्र र फुलमालाले सम्मान गर्नु भएको हो ।
‘मानव जीवनकै अत्यन्त गहन विषय मानव अधिकार जस्तो महत्वपूर्ण क्षेत्रमा ३० वर्ष व्यतित गरिसक्नुभएको उहाँ (शिवप्रसाद खकुरेल) लाई सम्मान गर्न पाउँदा हामीलाई खुसी लागेको छ । यस क्षेत्रमा उहाँले खेल्नुभएको भूमिकाले समुदाय सकारात्मक दिशातर्फ अगाडि बढेको कुराको पनि हामी मुक्तकण्ठले प्रशंसा गदर्छौं ।’- सम्मान पत्रमा उल्लेख छ ।