बाह्रबिसे नपा–७ की ७१ वर्षीया रत्नकुमारी थापाको हत्या गरेको आरोपमा सोही ठाउँस्थित खनियावासका ३६ वर्षीय सञ्जिव देउजालाई साउन २२ गते काठमाडौँस्थित गोङ्गबुबाट प्रहरीले गिरफ्तार गरेको छ ।
आरोपित देउजाले पीडित थापालाई साउन १९ गते राति सुतिरहेको अवस्थामा घाँटी थिचेर हत्या गरेको पीडित पक्षको आरोप छ । पीडित पक्षले साउन २१ गते आरोपितविरुद्ध इलाका प्रहरी कार्यालय बाह्रबिसेमा उजुरी दिएको छ ।
आरोपित देउजालाई मुलुकी अपराध संहिता २०७४ को ज्यानसम्बन्धी कसुरको दफा १७७ र चोरी तथा डाँकासम्बन्धी कसुरको दफा २४४ बमोजिम मुद्दा दर्ता गरी साउन २२ गते जिल्ला अदालतको अनुमतिले अनुसन्धान सुरू गरेको जिल्ला प्रहरी कार्यालयका डिएसपी निरञ्जन भट्टराईले बताउनु भयो ।
आरोपित देउजाले साउन १९ गते राति महिलाले प्राप्त गरेको १२ हजार रुपियाँ सामाजिक सुरक्षा (बृद्ध) भत्ता सहित ६५ हजार रुपियाँ लुटपाट गरी पीडितको घाँटी थिचेर हत्या गरेको आरोप छ ।
साउन २० गते बिहान अबेलासम्म घरमा एक्लै बसेकी एकल महिला नउठेपछि छिमेकीले खोजतलास गर्दा घरभित्रको भुँइतलामा हात बाँधेको अवस्थामा शव फेलापरेको थियो ।
पीडित महिलाको घाँटी थिचेर हत्या गरेको प्रहरीको प्रारम्भिक अनुसन्धान बाट खुल्न आएको डिएसपी भट्टराईको भनाई छ । शवको पोष्टमार्टम साउन २० गते काठमाडौँस्थित शिक्षण अस्पतालमा गरी आफन्तले सदगत् गरेका थिए ।