बाढीबाट प्रभावित भएका पाँचपोखरी थाम्पाल गाउँपालिका—२ स्थित याङ्ग्री गाउँमा राहत उपलब्ध नहुँदा, त्यहाँ रहेका ४७ घर परिवारको जीवन यापनमा समस्या भएको छ ।
गत ०८१ असार ३० गते राती लार्के खोलामा आएको बाढीले त्यस गाउँमा ठूलो क्षति पुर्याएको थियो । त्यसभेगमा रहेको वडा नं. १ र २ जोड्ने चिन्दे झोलङ्गेपुल, वडा नं. २ र ४ जोड्ने महांकाल झोलङ्गे पुल बगाएको थियो भने स्थानीय बासिन्दाको हजारौं रोपनी खेतियोग्य जमिन बगाएर नष्ट बनाएको थियो ।
बाढीले मेलम्ची—भोताङ खण्डको सडक बगाएर अवरुद्ध छ भने बाढीले बगाएर बन्द भएको बिजुली हालसम्म निर्माण हुन सकेका छैनन् । खानेपानीको मुहानहरू बाढीले बगाएर लगेपछि खानेपानी सूचारु हुन सकेकाे छैन। स्थानीयलाई खानेचिजहरुकै समस्या हुँदा याँहाका नागरिकहरूको जीवनयापन निकै कष्टकर बन्दै गएको छ ।
मेलम्ची बजारबाट निकै टाढा रहेको याङ्ग्री गाउँमा अहिले खाद्यान्नकै समस्या भएको स्थानीय गोपाल स्याङ्बोले बताउनु भयो । उहाँका अनुसार वल्लो पल्लो गाउँमा जान पुल छैन, बाटो छैन, भएको खाने चिजहरू सकियो, कतैबाट राहत नपाएकोले यस बस्तीमा निकै समस्या भएको छ ।
किनेर खाने ठाउँ छैन, किन्न जाने बाटो छैन हामी निकै समस्यामा परेको स्थानीय सुनबहादुर स्याङ्बोले बताउनुभयो । स्याङ्बोका अनुसार बिरामी पर्दा औषधी किन्ने ठाउँ छैन । बाटोको अभावले अस्पताल हिँडेर जान सकिदैन । पुरै गाउँ नाकाबन्दी जस्तै भएको छ ।
बाढी र पहिरोका कारण गाउँ पुरै नाकाबन्दी जस्तै भएको हुँदा नुन, तेल लगायत खाद्यान्नको समस्या त छँदै छ, बालबालिकाहरू विद्यालय जान पाएका छैनन्, बाढी आउनु भन्दा अगाडी नै आफन्त भेट्न अनेत्र गएका घरका परिवारहरु पुनः घर फर्कन पाएका छैनन् ।
यस्तो समस्या हुँदा पनि अहिलेसम्म कुनै निकायबाट राहत नपाएको र जनजिवन सहज बनाउन कतैबाट पहल नभएको स्थानीय मिठ्ठु तामाङले बताउनुभयो ।
असार ३० गते राती आएको लार्के खोलाको बाढीले यस गाउँपालिकामा ठूलो क्षति गराउनुका साथै वडा नं. २ स्थित याङ्ग्री गाउँमा आवत जावत गर्ने सबै पुल र बाटो बगाएकाले त्यस गाउँमा राहत लैजान समस्या भएको पाँचपोखरी थाम्पाल गाउँपालिका उपाध्यक्ष सुनिता अधिकारीले बताउनुभयो ।
उहाँका अनुसार त्यस गाउँका नागरिकहरूसँग नियमित टेलिफोन सम्पर्क त भइरहेकै छ । गाउँपालिकाले राहत लैजाने विषयमा योजना तयारी गरिरहेको बताउनुभयो ।