१७ वर्षीया बालिकासँग घोडाघोडी नगरपालिका—३ का २४ वर्षीय राकेश मल्लले बालविवाह गरेको कसुरमा ०८१ असार ३१ गते दुवै जनालाई चार महिना कैद सजायको फैसला गरिएको छ ।
जिल्ला अदालत, कैलालीका न्यायाधीश दण्डपाणी लामिछानेको इजलासले विवाह स्वतः बदर हुने गरी जनही चार महिना कैद सजाय, ३ हजार ३ सय ३३ रुपिया जरिवाना र कसुरदारहरु आफन्तको संरक्षणमा बस्ने गरी फैसला गरेको जिल्ला अदालत, कैलालीका श्रेष्तदार मानबहादुर विष्टले बताउनु भयो ।
बालविवाह गरेका कसुरदार मल्लसँग बालिकाले छुट्टिन नमानेपछि बालिकाले समेत कसुर गरेको ठहर गरी दुवै जनालाई सजाय र जरिवानाको फैसला भएको श्रेस्तेदार विष्टको भनाइ छ ।
बालविवाह गरेको भन्दै बालिकाकी आमाले २०८० फागुन १ गते इलाका प्रहरी कार्यालय, सुख्खडमा उजुरी दिनुभएको थियो ।
पीडित पक्षको उजुरीका आधारमा प्रहरीले सरकारी वकिल कार्यालयमार्फत आरोपित विरुद्ध जिल्ला अदालतमा बालविवाह अन्तर्गत मुद्दा दर्ता गरेकोमा जिल्ला अदालतले २०८० फागुन २ गते आफन्तको जिम्मा लगाउन आदेश दिएको थियो ।