अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश कार्यालय, धनगढीमा सुदूरपश्चिम प्रदेशको मानव अधिकारको अवस्था बारेमा ०८० चैत ८ गते सुदूरपश्चिम प्रदेश सरकारका प्रदेश प्रमुख नजिर मियाँसँग छलफल कार्यक्रम सम्पन्न भएको छ ।
इन्सेक सुदूरपश्चिम प्रदेश संयोजक खडकराज जोशीले समग्र सुदूरपश्चिम प्रदेशको मानव अधिकारको अवस्था, सामाजिक तथा राजनीतिक अधिकार, आर्थिक, सामाजिक तथा सांकृतिक अधिकारको बारेमा प्रदेश प्रमुख मियाँलाई जानकारी गराउनु भएको थियो ।
उहाँले सुदूरपश्चिम प्रदेशमा सन् २०२३ मा विभिन्न मानव अधिकार उल्लङ्घनका घटनामा राज्य पक्षबाट सात र अन्य पक्षबाट १ हजार १ सय ९० गरी १ हजार १ सय ९७ जना पीडित भएको र इन्सेक सुदूरपश्चिम प्रदेश कार्यालय, धनगढीले मानव अधिकारको संरक्षण र सम्बर्धनका लागि स्थानीय तह र प्रदेश सरकारसँग गर्दै आएको समन्वय र सहकार्यको बारेमा प्रदेश प्रमुख मियाँलाई जानकारी गराउनु भएको थियो ।
सुदूरपश्चिम प्रदेश प्रमुख नजिर मियाँले सुदूरपश्चिम प्रदेशको मानव अधिकारको अवस्थाका बारेमा चाँसो राख्दै संघसंस्थाहरुसँग समन्वय तथा सहकार्य गरेर जाँदा मानव अधिकारको क्षेत्रमा प्रभावकारी काम गर्न सहज हुने बताउनु भयो ।
आफू संविधान र कानुनको परिपालना गराउने जिम्मेवार निकायमा रहेकाले मानव अधिकार संरक्षण र सम्बर्धनका लागि प्रदेश सरकारले निर्माण गरिएका कानुनको प्रभावकारी कार्यान्वयनका लागि पहल गर्ने प्रतिबद्धता जाहेर गर्नु भयो ।
इन्सेक सुदूूरपश्चिम प्रदेश कार्यालय, धनगढीमा भएको छलफल कार्यक्रममा इन्सेकले सञ्चालन गर्दै आएका मानव अधिकारसँगसम्बन्धीत कार्यक्रम तथा गतिविधिहरुका बारेमा प्रदेश प्रमुख मियाँले जानकारी लिनुभएको थियो ।
