देशभर लैङ्गिक हिंसा विरूद्धको १६ दिने अभियान चलिरहेका बेला मदाने गाउँपालिका–६ की ८४ वर्षीया पबी खत्रीले भने पतिको घरमै किरिया गर्न पाउनु भएन । घरमा छोराहरूले किरिया गर्न नदिएपछि सार्वजनिक स्थानमै पतिको काज किरिया गर्नु भएको छ ।
खत्री स्थानीय सहकारीको भवनमा किरिया बस्नु भयो । काजकिरिया आफैमा अप्ठ्यारो । उमेर अवस्थाले वृद्धा रहनु भएको उहाँले टीनको छाना मूनि कष्ट खेप्दै पति तुलबहादुर खत्रीको किरिया गर्नु भयो ।
पबि तुलबहादुरकी दोस्रो पत्नी हुन् । तुलबहादुरको मङ्सिर १० गते मृत्यु भएको थियो । तुलबहादुर र पबीको ०२७ मा विवाह भएको थियो भने उहाँबाट एक छोरी जन्मिनु भएको छ ।
पतिको मृत्यु पछि पहिलो पत्नीतीरका छोराहरूले पबीलाई घरमा काजकिरिया गर्न दिएनन् । बुबाको मृत्यु भएकै दिन उहाकी छोरीले घरमा आमालाई किरिया बसाल्न खोजेपनि पहिलो पत्नीबाटका छोराहरूले नमानेपछि आफुहरू सार्वजनिक ठाउँ खोज्न बाध्य भएको छोरी नन्दा थापाले गुनासो गर्नुभयो ।
परिवारले आफ्नै घर÷जग्गामा काजकिरिया गर्न नदिएपनि पबीको नागरिकतामा पति तुलबहादुर खत्री क्षेत्री कायम छ । ०४५ वैशाख २२ गते जारी भएको पबीको नागरिकता नम्बर समेत १०९७९ रहेको छ ।
त्यसैगरी नन्दाको नागरिकतामा पनि बुवा तुलबहादुर नै उल्लेख छ । परिवारले काजकिरिया गर्न नदिएपछि आफूले सम्पत्तिको हकको लागि अदालत जाने योजना बनाएको पबीले बताउनु भयो ।
‘बुबाको किरिया गर्न नदिनेले आमामा किरिया पनि गर्दैनन् । आमाले अब सम्पति माग्दै अदालत जानुहुन्छ,’ नन्दाले भन्नुभयो ।
छोरा लोकबहादुर खत्रीले भने व्यवहारिकरुपमा आफूले पवीलाई आमा मान्न नसकिने प्रतिक्रिया दिनु भयो ।