वीरगंज महानगरपालिकाको–१९ का बरुण रामलाई अस्थायी प्रहरी पोष्ट बिन्दवासिनीका असई नवलेश तिवारीले कुटपिट गरेको भन्दै ०८० कात्तिक ५ गते स्थानियहरूले प्रहरी पोस्ट घेराउ गर्नुका साथै विरोध प्रदर्शन समेत गरेका छन् ।
पीडित विन्दवासिनीमा लागेको मेलामा बलुन बेचिरहेका थिए । वीरगंज महानगरपालिका–१९ विन्दवासिनीस्थित बिन्दवासिनी मन्दिरमा ०८० कात्तिक ५ गते वडादसैँको अवसरमा लागेको मेलामा असई तिवारीले सबै व्यपारीहरूसँग उठाइरहेको पैसा आफूले नदिएपछि कुटपिट गरेको पीडित रामकाे आरोप रहेकाे छ।
उहाँले भन्नु भयो “बिन्दवासिनी मेलामा मँ बलुन बेचिरहेको थिए । असई तिवारी आउनु भयो र पैसा माग्नु भयो, मैले पैसा दिइन । त्यसपछि बेचिरहेको ठाउँबाट बलुन हटाउन भन्नु भयो । मैलाई बलुन हटाई रहेको थिएँ त्यसैबीच मन्दिरबाट अरु दुई जना प्रहरीहरू आउनु भयो र मेरो सबै बलुन बाटोमा फालिदिनु भयो । मेरो बलुन किन फाल्नु भयो भन्दा मलाई समातेर प्रहरी पोष्टमा लगेर असईको अगाडि २/३ जना प्रहरीहरूले कुटपिट गर्नु भयाे।”
प्रहरीले हात र बुटले मलाई कुटपिट गर्नुको साथै मेरो ५/६ हजार रुपियाँको बलुनमा समेत क्षति पुर्याएको घटना बारे पीडितले इन्सेक जिल्ला प्रतिनिधिलाई जानकारी दिनु भयो ।
उक्त विषयमा असई तिवारीसँग फोनमा सम्पर्क गर्दा घटना बारे उहाँले केही बताउन नचाहेको इन्सेक जिल्ला प्रतिनिधिले जानकारी दिनु भयो ।
इलाका प्रहरी कार्यालय पोखरियाका इन्सपेक्टर मोहन बिक्रम केसीले विवाद सुल्झिसकेको बताउनु भयो । तर, पिडित रामले घटना भएको दिन मरो उपचार गराउन प्रहरीले भने पनि नगराएको गुनासो गरेका छन् ।