भानु नगरपालिका–१ नयाँ बस्तीकी ७३ वर्षीया ज्येष्ठ नागरिक एकल महिला रुमाया गिरीको घर ०८० असोज १४ गते अपरिचित समूहले भत्काइदिएपछि आवासविहिन हुनुभएको छ । आवासविहिन हुनुभएकी गिरीलाई मानवअधिकार समूह भानुकी सदस्य तुलसी गैह्रेले आश्रय दिनु भएको छ ।
ऐलानी जग्गामा भाइले बनाइदिएको सानो टहरोमा बस्दै आउनु भएकी गिरीको घर अपरिचित समूहले भत्काएपछि आफूले घरमा ल्याएर राखेको गैह्रेले बताउनु भयो । महिलाको एक छोरा भएपनि कहिलेकाँही मात्र आउने र आमालाई कुटपिट गर्ने, सुरक्षाभत्ताको पैसा समेत खोसेर लैजाने गर्ने गरेको गैह्रेले बताउनु भयो । छोरालाई कारबाही गर्न प्रहरीलाई अनुरोध गरेपनि प्रहरीले उजुरी बिना कारबाही गर्न नसकिने भन्दै आएको बताउनुभयो ।
इलाका प्रहरी कार्यालय भानुका इन्चार्ज प्रहरी इन्स्पेक्टर शुसिल पोख्रेलले यसबारेमा प्रहरीमा हालसम्म कुनै उजुरी नआएको बताउनु भयो । ‘अब मैले जानकारी पाएँ, टोल विकास संस्थाका व्यक्ति र पीडित पक्षलाई बोलाएर के भएको हो घटनाबारे बुझ्नेछु ।’ पोख्रेलले बताउनुभयो ।
