हुम्लाका स्थानीयबासीले पाँच केजी चामलको कुपन लिन जिल्ला प्रशासन कार्यालयमा चार घण्टा लाइनमा बस्नु परेको गुनासो गरेका छन् ।
जिल्लामा पाँच महिनापछि नेपाल खाद्य संस्थानले खाद्यान्न विक्री गर्ने भएपछि चामलको कुपन लिन सदरमुकाम सिमकोटमा करिब ५ सय स्थानीयबासीले लामो समय लाइनमा बस्नु परेको हो ।
चार घण्टा लाइनमा बसेपछि खाद्यान्नको कुपन पाएको सिमकोट गाउँपालिका-५ की काली बोहोराले बताइन् । उनले भनिन-‘कुपन पाएपछि फेरि तीन घण्टा लाइनमा बसेपछि पाँच केजी चामल पाएँ ।’
उनी जस्तै लामो समय लाइनमा बस्ने समस्या अन्य स्थानीयबासीको पनि रहेको छ । खाद्य संस्थानले ६ क्वीन्टल खाद्यान्न विक्री भएको जनाएको छ ।
स्थानीय प्रशासनले कुपन वितरण प्रकृया र चामल वितरण प्रकृया प्रभावकारी नगर्दा सेवाग्राहीले सास्ती व्यहोर्नु परेको अधिकारकर्मी तथा स्थानीयबासी रमेश ऐडीले बताए ।