विद्यालय भवन निर्माणका क्रममा आफूहरुले गरेको काम बापतको ज्याला रकम नपाएको भन्दै नौगाड गाउँपालिका–२ तल्ला सुण्डमुण्डका मजदुरहरुले ०८० भदौ १० गतेदेखि डाडाबाग आधारभूत विद्यालयमा अनिश्चितकालिन तालाबन्दी गरेका हुन् ।
विद्यालयमा मजदुरहरुले लगाएको तालाबन्दीका कारण विद्यालयको पठनपाठनमा समस्या भएको विद्यालयका प्रधानाध्यापक गगनसिह ठगुन्नाले बताउनु भयो । विद्यालयसँग भवन अभाव छ । उपभोक्ता र मजदुरले एक्कासी विद्यालयमा तालाबन्दी गर्दा विद्यालयका आवश्यक कागजात समेत कोठा भित्रै रहेको, पाँच कक्षसम्म सञ्चालनमा रहेको यस विद्यालयमा १ सय २७ जना विद्यार्थी अध्ययनरत रहेका र भवन अभावले विद्यार्थीलाई पुरानो भवनमा राखेर पठनपाठन गराउनु पर्ने बाध्यता रहेको उहाँले बताउनु भयो ।
तालाबन्दीका कारण विद्यार्थीहरुको पठनपाठन प्रभावित भएकोले उपभोक्ता समिति, मजदुर र स्थानीय तहका पदाधिकारीहरु बसेर तालाबन्दीको समस्या समाधान गर्न अग्रह गरिएको प्रधानध्यापक ठकुन्नाको भनाइ छ ।
सुदूरपश्चिम प्रदेश सरकारको समपुरक बजेट तथा थप गाउँपालिकाले बजेट व्यवहोर्ने गरी ०७८ पुस ५ गते भवन निर्माणको लागि सम्झौता भएको थियो । प्रदेश सरकारले दुई कोठे विद्यालय भवन बनाउने र एक कोठा थप गाउँपालिकाले बजेट व्यवहोर्ने गरी विद्यालय भवन निर्माण गरिएको थियो ।
भवन निर्माण कार्य ०७९ असार २४ गते सम्पन्न भएको भए पनि स्थानीय सरकारले मजदुरहरुलाई तिर्नुपर्ने झण्डै ७ लाख रुपियाँ हालसम्म भुक्तानी नभएपछि बाध्य भएर विद्यालय भवनमा ताला लगाउनुपरेको स्थानीय बीरसिह ठगुन्नाले बताउनु भयो ।
हामीले काम गरेको एक वर्ष बढि भइसक्यो, उहाँले भन्नु भयो, तर, अझै पनि भुक्तानी हुने छाटकाट नदेखेपछि बाध्य भएर तालाबन्दी गर्नुपरेको हो । अहिले पनि स्थानीय सरकारले चासो दिएर ज्याला रकम भुक्तानी नगरेमा विद्यालयमा सधै ताला रहिरहने उहाँको भनाइ छ ।
विद्यालय भवन निर्माण गर्दाका पाउने पर्ने ज्याला रकम आफूले अहिलेसम्म पनि पाउन नसकेको मिस्त्री धनसिह धामीले दुखेसो पोख्नु भयो । ज्याला रकम भुक्तानी गर्न पटकपटक अनुरोध गरिएको भए पनि सुनवाई नभएपछि बाध्य भएर विद्यालयमा तालाबन्दी गर्नु परेको उहाँले बताउनु भयो ।
निर्माण समितिले मजदुरको मात्रै २ लाख बढि रुपियाँ भुक्तानी गर्न बाँकी रहेको समितिका सचिव कासीसिह ठगुन्ना बताउनु हुन्छ । गाउँपालिकाले भुक्तानी नगर्दा आफूलाई समेत समस्या भएको उहाँले बताउनु भयो ।
नौगाड गाउँपालिका २ का वडाध्यक्ष नरेन्द्रसिह ठगुन्नाले गत वर्ष गाउँपालिकाले अनुगमन गरेर बजेट भुक्तानी नगरेका कारण समस्या उत्पन्न भएको र पछिल्लो समयमा आफूले निरन्तर दबाब दएिपछि कार्यपालिका बैठकले विद्यालयको अनुगमन मूल्याङ्कन गरी मजदुरहरुले पाउने रकम भुक्तानी गर्ने निर्णय गरेको बताउनु भयो ।
नौगाड गाउँपालिकाका अध्यक्ष दलजीतसिह धामीले विद्यालय भवन निर्माणसँगै पर्खाल लगाउनु पर्ने सम्झौता भए पनि उपभोक्ताहरुले पुरानो रकम भुक्तानी नभएको भन्दै पर्खाल नलगाएको बताउनु भयो ।
गाउँपालिकाले कार्य सम्पादन मुल्याङ्कन तथा विद्यालय अनुगमन गरेर वैङ्क खाता खोलेर भुक्तानी दिने तयारी गरिरहेको उहाँले बताउनु भयो ।