गुलरिया नगरपालिकास्थित बर्दिया अस्पतालमा दरबन्दी अनुसारको बिशेषज्ञ चिकित्सक नहुदाँ बिरामीहरू बिशेषज्ञ सेवाबाट वञ्चित हुन परेको छ । अस्पतालमा बिशेषज्ञ चिकित्सक नहुदाँ जटिल रोगका बिरामी उपचार गर्न जिल्ला बाहिर जानुपर्ने बाध्यता रहेको छ ।
लुम्बिनी प्रदेश अन्र्तगत रहेको अस्पतालमा १५ जना चिकित्सकको दरबन्दी रहेता पनि चार जना डाक्टर मात्र कार्यरत रहेका छन् । अस्पतालमा नौ जना स्टाफ नर्सको दरबन्दी रहेकोमा चार जना कार्यरत छन् । यसैगरी, १३ जना प्यारामेडिक्सको दरबन्दी रहेकोमा आठ जना कार्यरत रहेको छन् ।
अस्पतालले ओपिडी, इमरजेन्सी, सर्जिकल ओपिडी/इन्डोसकोपि सेवा, बालरोग सेवा, प्रसुती तथा स्त्रीरोग, फिजियोथेरापी लगायतको सेवा प्रदान गर्दै आएको छ । अस्पतालमा बिशेषज्ञ चिकित्सक नहुँदा हाडजोर्नी, मुटु, न्युरोरोग, सिकलसेल, मानसिक रोग लगायत अन्य रोगका बिरामीहरू जिल्ला बाहिर जान बाध्य छन् ।
बारबर्दिया नगरपालिका– ५ का सन्जु चौधरीले विशेषज्ञ चिकित्सक नहुदाँ उपचार र नियमित चेकजाँचका लागि भेरी अस्पताल नेपालगञ्ज जानु पर्ने बाध्यता रहेको बताउनु भयो । “आफूलाई प्रेसरका कारण आँखा, हात, खुट्टामा समस्या देखिएकोले विशेषज्ञ चिकित्सकबाट उपचार सेवा लिन नेपालगञ्ज गइराख्नु पर्छ । नेपालगञ्ज आउन जान समय लाग्छ । त्यसमाथि लाइन बस्नु पर्ने बाध्यता, यदि विशेषज्ञ चिकित्सक बर्दिया अस्पतालमा भए सहज हुने थियो ।,” चौधरीले भन्नु भयो ।
बर्दिया अस्पताल विशेषज्ञ चिकित्सक नहुदाँ आमाको उपचारको कोहलपुर जाने गरेको गुलरिया नगरपालिका– २ का राम सुवेदीले बताउनु भयो । सुवेदीले आफूले व्यक्तिगतरुपमा पनि विशेषज्ञ चिकित्सक सहित सेवा प्रवाहकालागि संघ प्रदेश र स्थानीय तहसँग अनुरोध गरेपनि समाधान नभएको बताउनु भयो ।
अस्पतालको तथ्याङ्क अनुसार आर्थिक वर्ष २०७९/०८० मा १ लाख १५ हजार ७ सय १८ जनाले उपचार सेवा लिएको पाइएको छ । त्यसैगरी आर्थिक वर्ष २०७८/०७९ मा १ लाख ७ हजार ४ सय ७८ जनाले उपचार सेवा लिएका छन् । भने आर्थिक बर्ष २०७७/०७८ मा ४५ हजार ९ सय ९६ जनाले उपचार सेवा लिएका थिए ।
अस्पतालमा मेडिकल सुपरिटेण्डेन डाक्टर सुभाष पाण्डेले अस्पतालमा थप सेवा प्रदान गर्न १५/२० जना चिकित्सक र ४० जना नर्सिङ स्टाफ आवश्यक रहेको बताउनु भयो । उहाँले समय अनुकुल, जनसंख्याको अनुपात, र सेवाग्राहीको संख्या हेरेर जनशक्ति व्यवस्थापन हुनुपर्ने बताउनु भयो ।
बर्दिया अस्पतालका अध्यक्ष नारायण गौतमले अस्पतालमा दरबन्दी अनुसार जनशक्ति व्यवस्थापन गरिदिन पटक पटक मन्त्रालय र विभागसँग आग्रह गरेको जानकारी दिनुभयो । मन्त्रालय र विभागबाट डाक्टरको सङ्ख्या कम भएकोले व्यवस्थापन गर्न नसकिएको जवाफ आउने गरेको जानकारी दिनुभयो ।
समितीसँग सिमित स्रोत र साधन भएपनि समितीबाट ७० जना जनशक्ति व्यवस्थापन गरेको अध्यक्ष गौतमले जानकारी दिनुभयो । उहाँले ५९ जनाको दरबन्दी भएता पनि २३ जना कार्यरत रहेको जानकारी दिनुभयो । उहाँले तत्काल अस्पतालमा इन्टरनल मेडिसिन बिशेषज्ञ, हाडजोर्नी रोग बिशेषज्ञ, एनेस्थेसिया बिशेषज्ञ, आवश्यक भएको जानकारी दिनुभयो ।
नेपालको संविधानको मौलिक हकको ३५ मा स्वास्थ्य सम्बन्धी हकको व्यवस्था गरिएको भए पनि कार्यान्वयन नहुँदा नागरिकले सास्ती व्यहोर्नु परेको छ ।