स्थानीय तह निर्वाचनको विरोधमा मधेस बन्दको आह्वान गरेको राजपा नेपालका कार्यकर्ताहरूले राजविराज नपा-७ मा असार ४ गते स.१व ५२९ नम्बरको सरकारी मोटरसाइकलमा आगजनी गरेका छन् ।
राजपाका कार्यकर्ताहरूले गजेन्द्र चौकस्थित राष्ट्रिय वाणिज्य बैङ्कमा पार्किङ्ग गरेर राखेको डाकनेश्वरी नगरपालिकाको मोटरसाइकल आगजनी गरेर क्षति पुर्याएका हुन् । आगजनीबाट उक्त मोटरसाइकल पूर्ण रूपमा जलेर नष्ट भएको छ ।
डाकनेश्वरी नगरपालिका-१ का वडा सचिव तपेश्वरकुमार साह कार्यालयको काम विशेषले बैङ्कभित्र गएको बेला बाहिर पार्किङ्ग गरेर राखेको मोटरसाइकल प्रदर्शनकारीहरूले आगजनी गरेको सई बह्रमदेव साहले बताए ।
यसैबिच सप्तरीको रुपनी गापा-१ स्थित रायपुर सडक खण्डमा यातायात बन्द गराउँदै हिँडेका राजपा नेपालका केन्द्रीय सदस्य दिनेश यादव गिरफ्तार भएको राजपाका केन्द्रीय सदस्य अमरनाथ मण्डलले जानकारी दिए । बस तोडफोड गरेको आरोपमा गिरफ्तार भएका यादवलाई प्रहरी चौकी कठौनामा राखिएको प्रहरीले जनाएको छ ।
संविधान संशोधनको माग गर्दै दोस्रो चरणको स्थानीय तह निर्वाचनको विरोधमा मधेस बन्दको आह्वान गरेको राजपा नेपालको प्रदर्शनका कारण यहाँबाट चल्ने लामो तथा छोटो दुरीको यातायात, कलकारखाना, शिक्षण संस्था ठप्प छन् । मोटरसाइकल, सिटी रिक्सा र अधिकांश पसलहरू भने सञ्चालनमा रहेका छन् ।