सल्यानको शिद्धकुमाख गाउँपालिका –३ स्थायी घर भइ जिल्ला प्रहरी कार्यालय डोल्पामा कार्यरत प्रहरी हवल्दार ३७ वर्षीय हरि आरसी साेही कार्यालयमा कार्यरत इन्स्पेक्टर नविन चापागाईंको कुटपिटबाट घाइते हुनु भएको छ ।
आफुले भनेको कुरा नमानेको भन्दै ४२ वर्षीय इन्स्पेक्टर चापागाईंले वैशाख १६ गते शनिवार विहान कार्यालय भित्र बोलाएर कुटपिट गरेको पीडितले बताउनु भयो । कुटपिटबाट प्रहरी हवलदार आरसीको बायाँ आखामा निलडाम हुने गरी चोट लागेको छ । घाइते हवलदार आरसीको जिल्ला अस्पताल दुनैमा सामान्य उपचार पछि थप उपचारको लागि नेपालगन्ज रिफर गरिएको अस्पतालका डाक्टर अखण्ड उपाध्यायले जानकारी दिनुभयो ।
कुटपिट गरेको दिन घाइते हवलदार आरसी विदामा भएपनि आदेश पालन नगरेको भन्दै कार्यालय भित्रै बोलाएर कुटपिट गरेको हवलदारले आफूलाई जानकारी गराएको डीएसपी केशव बुढाथोकीले बताउनुभयो । कार्यालय भित्र कुटपिट र हातपात गर्न नपाइने भएकाले घटनाबारे विस्तृत अनुसन्धान भइरहेको र दोषीलाई विभागीय कारवाही हुने पनि डीएसपी बुढाथोकीले जानकारी दिनुभयो ।