१६ वर्षीया अपाङ्गता भएकी बलात्कार पीडित बालिकालाई कानुनी प्रक्रियामा सहयोगको लागि इन्सेक लुम्बिनी प्रदेश कार्यालय नेपालगञ्जले चैत २८ गते आर्थिक सहयोग प्रदान गरेको छ ।
पीडित पक्षले चैत १९ गते इन्सेक जिल्ला प्रतिनिधि लक्ष्मी थारूसँग भेटघाटको क्रममा सहयोग गर्न अनुरोध गर्नुको साथै इन्सेक लुम्बिनी प्रदेश कार्यालयमा निवेदन दिनु भएको थियो ।
पीडतको सन्दर्भमा बर्दिया जिल्ला बढैयाताल गाउँपालिका –८ वडा कार्यालयले सहयोगका लागि चैत २३ गते सिफारिस गरेको थियो ।
पीडितलाई आरोपितले फागुन २ गते बलात्कार गरेको भन्दै पीडित पक्षले फागुन ३ गते बढैयाताल गाउँपालिका –८ का ४३ वर्षीय बाबुराज थापामगरविरूद्ध इलाका प्रहरी कार्यालय मैनापोखरमा उजुरी दिएका थिए ।
प्रहरीले आरोपितलाई फागुन ३ गते घरबाट गिरफ्तार गर्यो । सरकारी वकिल कार्यालय मार्फत जिल्ला अदालतमा जबरजस्ती करणी शिर्षकमा फागुन २६ गते मुद्दा दर्ता भयो ।
बालिका अनाथ भएको कहिले मामाघर त कहिले सानिआमाको घरमा आश्रय लिने गरेको र मानसिकरुपमा अपाङ्गता भएकी बालिकाको साहार कोही नभएको पीडित पक्षले बताए ।
पीडितको स्वास्थ्य परीक्षण फागुन ३ गते बर्दिया जिल्ला अस्पतालमा गरिएको थियो ।