घरबारविहिन रहेका वादी समुदायका पाँच परिवारलाई मंगलसेन नगरपालिकाले सदरमुकाम मै घर निर्माणको थालनी गरेको छ ।
सदरमुकाममा रहेको वडा नम्बर ५ को भैसेडाँडामा नगरपालिकाले नै जग्गा खरिद गरेर घर निर्माणको थालनी गरेको हो ।
घरजग्गा नभएका पाँच परिवारलाई आवासका लागि घर नभएपछि अघिल्लो वर्ष जग्गा खरिद गरेर यस वर्ष एकतले घर बनाउन थालेको मंगलसेन नगरपालिकाका प्रमुख पदमबहादुर बोहराले बताउनु भयो ।
एकतले पक्की घर बनाउन आवश्यक बजेट विनियोजन गरेर यसै आर्थिक वर्षमा सक्ने गरेर कोठा, भान्छा र शौचालयसहितको घर निर्माण गरिने मंलगसेन नगरपालिकाका प्रवक्ता बृखबहादुर बोगटीको भनाइ छ ।
नगरपालिकाले जग्गा खरिद गरेर घर निर्माण हुन थालेपछि घामपानीबाट छेकिएर बस्न सहज हुने प्रेम वादीले बताउनु भयो ।
उहाँले भन्नु भयो– ‘बस्नलाई आफ्नो घर थिएन् । रात बिताउन नै समस्या हुन्थ्यो । अब घर बन्ने भएपछि त राती आनन्दसँग निन्द्रा लाग्ने भयो ।’
घरको चिन्ताले पिरोलीरहेको बेलामा नगरपालिकाले नै घर बनाएर दिने भएपछि निकै खुसी भएको टंकी वादीको भनाइ छ ।
उहाँले यसअघि वादी परिवार नगरपालिकाको साँघुरो माटोको कच्ची घरमा कोचिएर बस्न बाध्य भएको र अब घर भएपछि आफूहरुलाई आयआर्जनमूलक काममा लाग्न पनि सहज हुने बताउनु भयो ।
पछाडि परेका र पारिएका व्यक्तिहरुको लागि स्थानीय सरकार अभिभावक भएर काम गर्ने नीति अनुसार आफूहरुले वादी परिवारको घर निर्माण गर्न लागेको नगरप्रमुख बोहराको भनाइ छ ।
आर्थिक अवस्था कमजोर भएका व्यक्ति तथा परिवारलाई सीपमूलक कार्यक्रम र अनुदानका कार्यक्रम समेत नगरपालिकाबाट प्रदान गरिरहेको समेत नगरप्रमुख बोहराले बताउनु भयो ।
नेपालको संविधान २०७२ को मौलिक हक अन्तर्गत धारा ३७ मा आवाससम्बन्धी हक उल्लेख गरिएको छ । जसमा प्रत्येक नागरिकलाई उपयुक्त आवासको हक हुनेछ भन्ने व्यवस्था छ ।