महालक्ष्मी नगरपालिका–७ अर्खौले जितपुरका २२ वर्षीय खेमराज अधिकारीले अदालतको आदेश कार्यान्वयन नहुँदा नेपाली नागरिकताको प्रमाणपत्रबाट आफू वञ्चित हुनु परेको गुनासो गर्नु भएको छ ।उच्च अदालत विराटनगर, धनकुटा इजलासले ०७९ कात्तिक १२ गते खेमराज अधिकारीलाई नागरिकता दिलाउनु भनि दिएको आदेशअनुसार महालक्ष्मी–७ वडा कार्यालयले सिफारिस नगरिदिँदा नागरिकता पाउनबाट वञ्चित भएको अधिकारीको गुनासो छ ।
अधिकारीले अदालतको आदेशको प्रतिलिपी लिएर लगातार एकसाता वडा कार्यालय धाउँदा पनि सिफरिस नदिएको बताउनु भएको छ ।
बाबु जङ्गमणि अधिकारीले अर्की पत्नी विवाह गरेर भक्तपुर बस्दै आएको र जन्मदर्ताको आधारमा मुद्दा दायर गरेर सोही अनुसारको अदालतबाट आदेश भएको खेमराजको भनाइ छ ।
०७९ पुस १४ गतेदेखि अदालतको फैसला लिएर वडा कार्यालय जाँदा वडाध्यक्ष नेत्रप्रसाद अधिकारी निवेदन दर्तासम्म नगरेको अधिकारीको आरोप छ ।
बाबु जङ्गमणिलाई पटकपटक नाता प्रमाणित गरेर नागरिकता बनाइदिन अनुरोध गर्दा नमानेपछि ०७६ पुस १९ गते उच्च अदालत विराटनगर, धनकुटा इजलासमा नाता प्रमाणित र अंशवण्डा मुद्दा दर्ता गर्नुपरेको खेमराजको भनाइ छ ।
करिव ३ वर्षपछि मुद्दाको फैसला भयो । उहाँलाई अदालत न्याय दियो । ०७९ पुस १२ गते अदालतका न्यायाधीश फुर्वा तामाङले जङ्गमणि कै छोरा खेमराज भएको कागजातबाट खुल्न आएको भनी फैसला गर्नु भएको छ ।
फैसलाले खेमराजलाई नागरिकता दिलाउन जिल्ला प्रशासन कार्यालय र महालक्ष्मी– ७ को वडा कार्यालयलाई आदेश दिएको छ । आदेशमा जङ्गमणिले अंश भराउनु पर्ने उल्लेख छ ।
तर, वडा कायालयले नागरिकताको सिफारिस नगरेको तथा बाबु जङ्गमणिले अंशमा कुनै चासो नदिएको आरोप खेमराजको छ । जसका कारण अदालतले खेमराजलाई नागरिकतासहित अंश दिलाउन आदेश दिएको भएपनि नागरिकता नै नबन्दा समस्या भएको छ ।
बाबुले आमा कुलदेवी रायाको नागरिकता नबनाएपछि मावलीले आमाको नागरिकता बनाइदिएको खेमराज अधिकारीले बताउनु भयो ।
अदालतले पुस १२ गते फैसला गरेको र १४ गतेदेखि वडा कार्यालय धाउँदा वडाध्यक्षले १७ गते, १८ गते भन्दै टारेको त्यसपछि भोलि भन्दै १९ गते पुर्याएको त्यसपछि २० गते आउनु भनेको तर काम नगरेको खेमराजको आरोप छ ।
वडाध्यक्ष नेत्रबहादुर अधिकारीले पुस २० गते सिफारिस दिन्छु भनेपछि आफूले घरपरिवार र ३०-३५ जना छिमेकी लिएर वडा कार्यालय जाँदा सबैका अगाडि सिफारिस दिन्छु भनेपनि अरू हिँडेपछि आनाकानी गरेको खेमराजले इन्सेक प्रतिनिधिसँग बताउनु भयो ।
बाबु जङ्गमणिले दोस्रो बिहे गरेर भक्तपुर बस्दै आएको र नागरिकता दिए अंश दिनुपर्ने भनेर बाबुले नै नागरिकताको सिफारिस दिन वडाध्यक्षलाई रोकेको अधिकारीको भनाइ छ । वडाअध्यक्ष नेत्रबहादुर अधिकारी ठूलो बाबु पर्ने भएकाले पारिवारिक कारणले सिफारिस नदिएको आरोप खेमराजको छ ।
प्रमुख जिल्ला अधिकारी युवराज कट्टेलले वडा कार्यालयबाट सिफरिस लिएर आउन भनेको र सिफारिस नआएकाले मात्रै नागरिकताको काम रोकिएको बताउनु भयो ।
वडाअध्यक्ष नेत्रबहादुर अधिकारीले हाल सर्वोच्चमा मुद्दा विचाराधिन रहेको कारणले सिफारिस नदिएको इन्सेक प्रतिनिधिसँग बताउनु भयो ।
वडाध्यक्ष अधिकारीले जङ्गमणिले कुलदेवी, खेमराज, वडा कार्यालय, जिल्ला प्रशासन कार्यालय धनकुटा र उच्च अदालतलाई विपरित बनाएर दायर गरेको मुद्दा सर्वोच्चमा विचाराधिन रहेको बताउनु भयो ।
सबै कागजपत्र दुरूस्त भएमा सिफारिस गर्ने हो, सर्वोच्चमा मुद्दा विचाराधिन रहेको कारण सिफारिस गर्न नसकेको वडाध्यक्ष नेत्रबहादुरले बताउनु भयो । सर्वोच्चमा डिएनए टेष्ट गरी पाउँ, उच्च अदालतको एकोहोरो फैसला भएको भनि मुद्दा दायर गरेको जानकारीमा आएको वडाध्यक्ष अधिकारीको भनाइ छ ।
सर्वोच्चको फैसला नआएसम्म सिफारिस नगर्ने र वकिलको परामर्शमा काम गरेको वडाध्यक्ष अधिकारीले बताउनु भयो ।
वडाध्यक्ष अधिकारीले कुलदेवी राया आफ्नो मामाको छोरी र जङ्गमणि काकाको छोरा भएको बताउनु भयो ।
पुस १५ र १६ गते सार्वजनिक विदा रहेको र १७ गते पारिवारिक कारणले खाँदवारी गएर १८ गते आएका कारण खेमराजको विषयमा छलफल गर्न नपाएको अधिकारीले बताउनु भयो ।
वडाध्यक्ष अधिकारीले पुस १९ गते वडा कार्यालयमा निवर्तमान वडाध्यक्षसहित भद्र भलादमी राखेर छलफल गरेको भएपनि सिफारिस दिने विषय टुङ्गो नलागेको बताउनु भएको छ ।
