विराटनगर महानगरपालिका–३ का ३७ वर्षीय एम्बुलेन्स चालक चन्दन मुखियालाई मङ्सिर २३ गते कुटपिट गरेको आरोपमा प्रहरीले कटहरी गाउँपालिका–३ का ३७ वर्षीय अजय कामतलाई मङ्सिर २३ गते गिरफ्तार गरेको छ ।
पीडितले आफूलाई आरोपित कामतले मङ्सिर २२ गते मादक पदार्थ सेवन गरी कटहरी गाउँपालिका–२ स्थित नहरको छेउका बिनाकारण कुटपिट गरेको आरोपमा मङ्सिर २३ गते जिल्ला प्रहरी कार्यालयमा उजुरी दिनु भएको थियो ।
पीडित पक्षको उजरीका आधारमा आरोपितलाई अनुसन्धानका लागि घरबाटै गिरफ्तार गरेको जिल्ला प्रहरी कार्यालयका डिएसपी टिकाबहादुर कार्कीले बताउनु भयो ।
गर्भवती बिरामी महिला बोकेको सामुदायिक समाज उत्थान केन्द्रको को १ च ४०७९ नम्बरको एम्बुलेन्समा आरोपित कामतले तोडफोड गरेको पीडितको आरोप छ ।
तोडफोडबाट एम्बुलेन्सको अगाडि सिसा भएको भाग क्षतिग्रस्त हुँदा ५० हजार रुपियाँ बराबरको क्षति भएको पीडित एम्बुलेन्स चालकको भनाइ छ ।
कुटपिटबाट आँखामा चोट लागेका एम्बुलेन्स चालक मुखियाको मङ्सिर २२ गते कोशी अस्पतालमा उपचार गरिएको छ ।
मानव अधिकार रक्षक सम्बन्धी घोषणपत्र सन् १९९८ ले एम्बुलेन्स चालकलाई मानव अधिकार रक्षकका रुपमा परिभाषित गरेको छ ।