घरेलु हिंसा पीडित सुर्खेतको वीरेन्द्रनगर नगरपालिका ११ की पीडित मनिसा थापालाई कानुनी प्रकृयामा जानका लागि अनौपचारिक क्षेत्र सेवा केन्द्र (इन्सेक) कर्णाली प्रदेश कार्यालय, सुर्खेतले ०७९ मङ्सिर ८ गते पाँच हजार रुपैयाँ सहयोग गरेको छ ।
श्रीमानले परपुरुषसँग लागेको भन्दै जिल्ला प्रहरी कार्यालयमा उजुरी दिए पश्चात पीडितलाई प्रहरीले १८ दिन हिरासतमा राखेको समेत गुनासो गर्नु भएको छ । हिरासतबाट पीडित थापाको वहिनीको जिम्मा लगाएर प्रहरीले पठाएको थियो । घरमा आएको खण्डमा वहिनी र दिदी दुवैजनालाई ज्यानमार्ने धम्की दिएको र श्रीमानले पहिला देखी नै कुटपिट गर्दै आएका समेत पिडित थापाले इन्सेकलाई दिएको निवेदनमा उल्लेख छ ।
आर्थिक अवस्था कमजोर भई न्यायिक प्रकृयामा जान नसकेको भन्दै पीडितले ०७९ भदौ १२ गते मानव अधिकार सहायता कक्षमा सहयोगका लागि निवेदन दिनु भएको थियो । पीडितको निवेदन सम्बन्धमा मानव अधिकार सहायता कक्षको कात्तिक १५ गते बसेको निर्णय अनुसार पीडितलाई सहयोग गरिएको इन्सेक कर्णाली प्रदेश संयोजक नारायण सुवेदीले बताउनु भएको छ ।
पीडितलाई न्याय प्रक्रियामा जाँदा लाग्ने निवेदन शुल्क, फोटोकपी र यात्राखर्च लगायतका शिर्षकमा सहयोग पुग्ने उद्देश्यले उक्त रकम सहयोग गरिएको प्रदेश संयोजक सुवेदीले जानकारी दिनु भएको छ ।
