मिथिलाविहारी नगरपालिका–५ ललिया बस्ने ४५ वर्षीया जिवछी देवी मण्डललाई कोदोलो प्रहार गरी हत्या गरेका आरोपमा जिल्ला प्रहरी कार्यालय धनुषाले ५० वर्षीय पति रामा मण्डल केवटलाई असोज ९ गते गिरफ्तार गरेको छ ।
घरायसी विवादको क्रममा असोज ४ गते आरोपितले पत्नी जिवछी देवीलाई घर नजिकैको बाँसघारीमा टाउकोमा कोदालो प्रहार गरी हत्या गरेको आरोप छ ।
प्रहरीले घटनाको अनुसन्धानको क्रममा असोज ९ गते पत्नीको काजक्रियामा बसेको अवस्थामा आरोपितलाई घरबाटै गिरफ्तार गरेको हो । शवको प्रादेशिक अस्पताल जनकपुरमा असोज ४ गते पोस्टमार्टम गरिएको छ ।
आरोपित रामा मण्डल र मृतक जिवछी देवीको २२ वर्षीय छोरा विनय मण्डल र कान्छो छोरा २० वर्षीय संजय मण्डल वैदेशिक रोजगारको सिलसिलामा कतारमा रहेको छ ।
घरायसी कामकाजको क्रममा ऋण लागेकोमा जेठो छोराले अन्दाजी १८/२० लाख रुपियाँ, विवाहमा दाइजो पाएको मोटरसाइकल तथा पत्नीको गरगहनासमेत बेची ऋण तिरेका थिए ।
कान्छो छोरा संजय मण्डल हाल विदेशबाट कमाएको पैसा आमा जिवछी देवी मण्डललको नाममा पठाउँदै गरेकोले बाँकी रहेको ऋण तिर्न पति रामा मण्डल केवटलाई असहयोग गरेको भन्दै पति र पत्नी बिचमा विवाद भई घटना भएको जिल्ला प्रहरी कार्यालय धनुषाका डिएसपी प्रदिप बहादुर क्षेत्रीले बताउनु भयो ।