डोल्पो बुद्ध गाउँपालिकाका नागरिकलाई सरकारी सेवा लिनका लागि काइके गाउँपालिकाका युवाहरूले सदरमुकाम दुनै जान बन्देज लगाएको डोल्पो बुद्ध गाउँपालिकाका स्थानीयबासीले आरोप लगाएका छन् ।
ब्यक्तिगत तथा सरकारी कामको सिलसिलामा सदरमुकाम दुनैतर्फ जाने क्रममा डोल्पो बुद्ध गाउँपालिकाका नागरिकलाई बाटो कुरेर काइके गाउँपालिकाका युवाहरूले कुटपिट गरी कसदरमुकाम जान रोक लगाएको आरोप उनीहरूको छ ।
डोल्पो बुद्ध गाउँपालिका–१ धो का नोर्वु थिन्ले लामा, डोल्मा लामा र गर्भवती महिला लुजुङ्ग गुरुङ्गलाई असार १९ गते सदरमुकामतर्फ जाँदै गरेको अवस्थामा काइके गाउँपालिकाका अमित बुढा, बमबहादुर ठकुल्ला, कैलाश मगर र पाल्जोर रोकायासहितका करिब १०/१२ जनाको सङ्ख्यामा रहेका युवाहरूले कुटपिट गरी सदरमुकाम आउन नदिएर बीच बाटोबाटै फर्काएको आरोप धो तरापका क्याल्पो थापा भोटेले लगाउनु भएको छ ।
जिल्ला कृषि विकास कार्यालय अन्तरगतका साना सिचाई योजना सम्पन्न गरी भुक्तानीको लागि धो तरापका नोर्वु थिन्ले लामा र डोल्मा लामा असार १९ गते सदरमुकामतर्फ जादै गर्दा ठूलीभेरी नगरपालिका– १ र काइके गाउँपालिकाको बीचमा पर्ने पाल्च खोला नजिक काइकेका युवाले कुटपिट गरेको पीडित पक्षको आरोप छ ।
लुजुङ्ग गुरुङ्ग स्वास्थ्य परीक्षणको लागि सदरमुकामतर्फ जादै हुनु हुन्थ्यो । डोल्पो बुद्ध गाउँपालिका–१ धो का तार्के लामा, कुन्जोम लामा, क्याल्पो थापा भोटे र धावा छिरिङ गुरुङ्गले संघीय सासंद धनबहादुर बुढा, पूर्व जिल्ला समन्वय समितिका प्रमुख शेरबहादुर बुढा, काइके गाउँपालिका अध्यक्ष अंगत राना, नवनिर्वाचित जिल्ला समन्वय समितिका उपप्रमुख तेजेन्द्र रोकायाको निर्देशनमा अमित राना र पाल्जोर रोकाया सहितका करिब १०/१२ जनाको समूहमा रहेका युवाहरूले कुटपिट गरेको आरोप लगाउदै प्रहरी चौकी धोमा असार २० गते निवेदन दिनु भएको छ ।
क्याल्पो थापा भोटे लगायतका ब्यक्तिहरूले आफूप्रति लगाएको आरोप कपोकल्पित भ्रामक र चरित्र हत्या गर्ने उदेश्य रहेको बताउँदै आफ्नो लागि सबै नागरिक बराबर भएको सासंद धनबहादुर बुढाले बताउनु भयो ।
उहाँले भन्नु भयो म मात्र होइन काइकेका कुनैपनि नागरिकले यस्तो अमानवीय कार्य गर्दैनन । जिल्ला प्रहरी कार्यालय, डोल्पाका डीएसपी निरन्जन थापाले असार १९ गतेका दिन कुनै पनि नागरिकको अपहरण र कुटपिट भएको जानकारी प्रहरी कार्यालयमा नआएको बताउनु भयो ।
धो का युवाहरूलाई काइके गाउँपालिकाका युवाहरूले कुटपिट गरी सदरमुकाम आउन बन्देज लगाएको घटना के हो ? भन्ने विषयमा अनुसन्धान भइरहेको डीएसपी थापाले जानकारी दिनु भयो ।
