सरकारले कक्षा १–१२ सम्म निःशुल्क पठनपाठन हुनुपर्ने व्यवस्था गरेपनि तिला गाउँपालिका –३ कुडारीस्थित सरस्वती माध्यामिक विद्यालय व्यवस्थापन समितिले विद्यालयको आन्तरिक कोष बृद्धि गर्नका लागि विद्यार्थीबाट शुल्क लिने गरेको छ ।
विद्यालयका अध्यक्षसहित समितिका सदस्य र सदस्य सचिव प्रधानाध्यापक रामविलास यादवले श्रृङ्खलाबद्ध रूपमा मनोमानी तरिकाले मापदण्ड विपरित २०७७ असोज २३ गते निर्णय गरेर बालबालिकाबाट शुल्क लिने गरेको स्थानीय मानबहादुर बुढाले बताउनु भयो ।
उहाँले भन्नुभयो,–‘उक्त विद्यालयले कक्षा १ देखि ५ सम्म ५० रूपियाँ र कक्षा ६ देखि १० सम्म अध्ययनरत विद्यार्थीबाट एक सय भर्ना शुल्क लिने गरेको छ ।’
त्यस्तै, जुनसुकै सिफारिसका लागि कक्षा १ देखि ५ सम्मलाई ५० रूपियाँ र चारित्रिक प्रमाणपत्र वापत १ देखि १० सम्मका विद्यार्थीका लागि पाँच सय रूपियाँ, कक्षा १२ को लागि सात सय रूपियाँ र पछिल्लो समयमा लब्धाङ्क पत्रको पनि आठ सय देखि १ हजार पाँच सय रूपियाँ सम्म लिने गरेको अविभावकहरूले गुनासो गरेका छन् ।
प्रधानाध्यापक यादवले विद्यार्थीबाट शुल्क उठाएको बारेमा स्वीकार गर्नुभयो । उहाँले भन्नुभयो,–‘बिद्यालयको अन्तरिक आय स्रोत केही नभएकोले उठाएको शुल्कले बिद्यालयको खानेपानी, बेन्च मर्मत र एक जना कम्प्युटर शिक्षकलाई तलब दिने गरिएको छ ।’
सरकारले कक्षा १२ सम्म निशुःल्क शिक्षा भनेको छ तर, बजेटको ब्यवस्था गरेको छैन । उहाँले थप्नुभयो,–‘सरकारले कक्षा ६ देखि कम्प्युटर शिक्षा अनिवार्य गरेको छ तर, शिक्षकका लागि दरबन्दीको ब्यवस्था गरेको छैन ।’
छात्रा अनिता कठायतका अनुसार सरस्वती प्राविधिक बिद्यालयमा बिद्यार्थीबाट शुल्क असुलेर कम्प्युटर शिक्षक राखेपनि बिदार्थीले कम्प्युटर देख्नसमेत पाएका छैनन ।
शिक्षा विकास तथा समन्वय इकाई जुम्लाका प्रमुख मक्कर भण्डारीले कुनै पनि बहानामा विद्यार्थीबाट शुःल्क लिन नपाइने र राज्यले कक्षा १ देखि १२ सम्म निशुःल्क शिक्षाको व्यवस्था गरेको बताउनु भयो ।
उहाँले भन्नुभयो ‘विद्यार्थीबाट लिएको शुल्क विद्यालयले फिर्ता गर्नु पर्दछ ।’